2024 ەڭ ىستىق جىل رەتىندە تىركەلدى

بريۋسسەل. KAZINFORM - بيىل ورتاشا جاھاندىق تەمپەراتۋرا انومالياسى 1991-2020-جىلدارداعى ورتاشا تەمپەراتۋرادان 0,72 گرادۋسقا جوعارى بولدى، دەپ جازادى انادولى.

ەۋروپالىق وداقتىڭ (ە و) Copernicus سپۋتنيكتىك مونيتورينگ جۇيەسىنىڭ مالىمەتى بويىنشا، 2024-جىل رەكوردتىق دارەجەدە «ەڭ ىستىق جىل» بولدى.

مالىمەتتەرگە سايكەس، وتكەن اي «ەكىنشى ەڭ جىلى قاراشا» بولعان جانە جەر بەتىندەگى اۋانىڭ ورتاشا تەمپەراتۋراسى 14,10 گرادۋستى قۇراعان.

بۇل 1991-2020-جىلعى قاراشاداعى ورتاشا كورسەتكىشتەن 0,73 گرادۋسقا جوعارى.

2024-جىلداعى ورتاشا جاھاندىق تەمپەراتۋرا انومالياسى (قاڭتار-قاراشا ايلارىندا) 1991-2020-جىلدارداعى ورتاشا تەمپەراتۋرادان 0,72 گرادۋسقا جوعارى بولعان. بۇل كورسەتكىش 2023-جىلدىڭ سايكەس كەزەڭىنەن 0,14 گرادۋسقا جىلى بولعانىن كورسەتتى.

وسىلايشا، «2024-جىل تاريحتاعى ەڭ ىستىق جىل بولادى» دەگەن بولجام راستالدى.

Copernicus Climate Change Service (C3S) ديرەكتورىنىڭ ورىنباسارى سامانتا بەردجەسستىڭ ايتۋىنشا، 2024-جىل رەكوردتىق ەڭ ىستىق جىل بولۋمەن قاتار جاھاندىق تەمپەراتۋرانىڭ كوتەرىلۋى 1,5 گرادۋستان اسقان ءبىرىنشى جىل بولىپ وتىر.

سونىمەن قاتار بەردجەسس «كليماتتى قورعاۋعا باعىتتالعان شارالاردى قابىلداۋ وتە ماڭىزدى» ەكەنىن قوسا كەتتى.

وسىعان دەيىن كليماتتىڭ وزگەرۋى بۇكىل الەمدەگى داۋىلدىڭ جىلدامدىعىن ورتاشا ەسەپپەن 29 ك م/ساعاتقا ارتتىراتىنىن جازعان ەدىك.