2024 -جىلى يلون ماسكتىڭ جەكە ۇشاقتارى قانشا رەيس جاسادى
استانا. قازاقپارات - Business Insider JetSpy كومەگىمەن يلون ماسكتىڭ جەكە رەاكتيۆتى رەيستەرىنە تالداۋ جاسادى. جاڭالىقتار پورتالىنىڭ مالىمەتىنشە، امەريكالىق ميللياردەردىڭ ەكى Gulfstream ۇشاعى اعىمداعى جىلدىڭ قاڭتار ايىنان جەلتوقسان ايىنىڭ ورتاسىنا دەيىن بارلىعى 355 رەيس جاساعان.
الەمدەگى ەڭ باي ادامنىڭ جەكە ۇشاقتارى اسپاندا شامامەن 881 ساعات ۇشقان.
Business Insider 2024 -جىلى ماسكتىڭ ۇشاقتارى پالم- بيچ اۋەجايىنا نەمەسە ودان 31 رەيس جاساعانىن حابارلايدى. دونالد ترامپقا تيەسىلى Mar-a-Lago جەكە رەزيدەنتسياسىنىڭ وسى اۋەجايدىڭ جانىندا ورنالاسقانى دا اتالىپ ءوتتى.
بۇل ايماققا 31 رەيستىڭ 25 ءى ترامپ سايلاۋدا جەڭىسكە جەتكەننەن كەيىن ورىندالدى. ماسك ترامپتى رەسمي تۇردە قولداي باستاعاننان كەيىن ۇشاقتار پەنسيلۆانيا جانە دجوردجيا سياقتى شتاتتارعا 13 رەيس جاسادى.
الايدا يلون ماسكتىڭ ءوزى ءاربىر رەيستە بولعانى جانە ونىڭ پالم- بيچ ايماعىنا ترامپپەن كەزدەسۋدەن باسقا سەبەپتەرمەن بارعان، بارماعانى بەلگىسىز.
سونداي- اق 2024 -جىلى ونىڭ ۇشاقتارىنىڭ نەگىزگى باعىتتارىنا SpaceX نىساندارىنىڭ جانىندا ورنالاسقان حوتورن (كاليفورنيا) جانە براۋنسۆيللدەگى (تەحاس) اۋەجايلار كىردى. ولار سونداي- اق تەسلانىڭ شتاب- پاتەرى مەن ماسكتىڭ ۇيلەرىنىڭ بىرىنە جاقىن وستين اۋەجايىنا ءجيى ۇشاتىن.
ۇشاقتار سونىمەن قاتار فرانسيا، پولشا، گەرمانيا، پورتۋگاليا، يندونەزيا، قىتاي جانە ۇلى بريتانياعا ۇشتى. ماسك پاريج وليمپياداسىنا جانە نوتر- دام سوبورىنىڭ اشىلۋىنا، سونداي- اق باليگە Starlink ۇشىرۋىنا باردى.
JetSpy مالىمەتىنشە، ميللياردەردىڭ ەكى ۇشاعى شامامەن 2,5 ميلليون دوللارعا جانارماي تۇتىنىپ، 2024 -جىلى 4000 توننا كومىرقىشقىل گازىن شىعارعان.
2022 -جىلدان باستاپ ماسك جەكە ۇشاقتاردىڭ قوزعالىسىن جاسىرۋعا مۇمكىندىك بەرەتىن فەدەرالدى باعدارلامانى پايدالانادى.
