2024- جىلى ۇلتتىڭ قايتا ورلەۋىنىڭ كۋاسى بولامىز - قاسىم-جومارت توقايەۆ

مەملەكەت باسشىسى قاسىم-جومارت توقايەۆ جاڭاجىلدىق بەينەقۇتتىقتاۋىندا كەلەر جىلى قانداي ءىرى شارالار وتەتىنىن ايتتى، دەپ حابارلايدى Kazinform.

«جاڭا جىل - ءاردايىم جاڭا مىندەتتەر جۇكتەلەتىن، جاڭا سىن-قاتەرلەردى ەڭسەرەتىن كەزەڭ. ءبىز كەلەسى جىلى ۇلتتىڭ قايتا ورلەۋىنىڭ كۋاسى بولامىز. مەن بۇعان كامىل سەنەمىن. الايدا باسەكەگە قابىلەتتى ءارى دامىعان ەل بولۋ ءۇشىن ءالى دە كوپ تەر توگۋىمىز قاجەت»، - دەدى قاسىم-جومارت توقايەۆ.

پرەزيدەنت جاڭا جىلدا مەملەكەتتىگىمىزدى نىعايتۋ جانە حالىقتىڭ ءال-اۋقاتىن ارتتىرۋ جولىنداعى جۇيەلى رەفورمالار جالعاساتىنىن جەتكىزدى.

«ءبىز زاڭ مەن ءتارتىپتىڭ ۇستەمدىگىن ورنىقتىرۋ ءۇشىن كەشەندى شارالار قابىلدايمىز. مەملەكەت تاراپىنان ونەركاسىپتى، اۋىل شارۋاشىلىعىن، ەنەرگەتيكا جانە ەكونوميكانىڭ باسقا دا سالالارىن وركەندەتۋدى كوزدەيتىن تىڭ باستامالار قولعا الىنادى. ءبىز الەۋمەتتىك جاعدايى تومەن، كومەككە مۇقتاج جاندارعا ءاردايىم قامقور بولامىز. ءمۇعالىم، دارىگەر، قۇتقارۋشى، اسكەري قىزمەتشى، ءتارتىپ ساقشىسى جانە باسقا دا كاسىپ يەلەرىنە قولداۋ كورسەتەمىز»، - دەدى ول.

سونىمەن بىرگە، جاس ۇرپاقتىڭ جارقىن بولاشاعىنا جول اشاتىن ماڭىزدى شەشىمدەر قابىلدانۋدا. جاقىندا ۇلتتىق قورداعى قارجىنىڭ ءبىر بولىگى بالالاردىڭ ەسەپشوتىنا تۇسە باستايدى.

«ەلىمىزدىڭ جاستارى بولاشاققا نىق سەنىممەن قاراۋى كەرەك. كەلەسى جىلى ۇلتىمىزدىڭ تاريحىنا بايلانىستى ءبىرقاتار ءىس- شارا وتەدى. حالقىمىزدىڭ تۇلعالارىن ەستە ساقتاپ، ولاردىڭ ەڭبەگىن دارىپتەۋ - ۇرپاق پارىزى. سونداي-اق الداعى جىلى ەلىمىزدە دۇنيەجۇزىلىك كوشپەندىلەر ويىنى وتەدى. سپورتشىلارىمىز جازعى وليمپياداعا قاتىسادى. تۇپتەپ كەلگەندە، ءار ازامات ءوز سالاسىنىڭ ناعىز مامانى بولۋى كەرەك. سوندا عانا وتانىمىز ءوسىپ- وركەندەيدى»، - دەدى مەملەكەت باسشىسى.