2024 -جىلدىڭ ناۋرىزى تاريحتاعى ەڭ ىستىق اي رەتىندە تىركەلدى
استانا. KAZINFORM - وتكەن ناۋرىز ايى الەم بويىنشا رەكوردتىق ەڭ ىستىق اي بولدى. مەتەورولوگتار ونىنشى اي قاتارىنان اي سايىنعى تەمپەراتۋرا رەكوردىن تىركەدى. بۇل تۋرالى Copernicus ەۋروپالىق كليماتتىق قىزمەتى حابارلادى.
Copernicus مالىمەتتەرى بويىنشا، اقپان ايىندا پلانەتانىڭ بەتىندەگى ورتاشا تەمپەراتۋرا سەلسيي بويىنشا 14,14 گرادۋستى قۇرادى - بۇل 1991 -جىلدان 2020 -جىلعا دەيىنگى ناۋرىزداعى ورتاشا كورسەتكىشتەن 0,73 گرادۋسقا جوعارى. سونىمەن قاتار بۇل 2016 -جىلدىڭ ناۋرىزىندا تىركەلگەن الدىڭعى رەكوردتىق ەڭ جىلى ايدان 0,10 گرادۋسقا جوعارى.
سوڭعى 12 ايداعى (2023 -جىلدىڭ ساۋىرىنەن 2024 -جىلدىڭ ناۋرىزىنا دەيىن) جاھاندىق ورتاشا تەمپەراتۋرا دا رەكوردتىق كورسەتكىشكە جەتتى. تەمپەراتۋرا 1850−1900 -جىلدارداعى يندۋسترياعا دەيىنگى كەزەڭنەن سەلسي بويىنشا 1,58 گرادۋس جوعارى بولدى.
«2024 -جىلدىڭ ناۋرىزى اۋا مەن تەڭىز بەتىنىڭ تەمپەراتۋراسى بويىنشا كليماتتىق رەكوردتاردى ورناتۋدى جالعاستىرىپ جاتىر.. . جاھاندىق جىلىنۋدى توقتاتۋ ءۇشىن پارنيكتىك گازدار شىعارىندىلارىن جىلدام ازايتۋ قاجەت»، - دەدى Copernicus ديرەكتورىنىڭ ورىنباسارى سامانتا بەردجەسس.
ەۋروپادان باسقا، سولتۇستىك امەريكا، گرەنلانديا، رەسەي، ورتالىق امەريكا، وڭتۇستىك امەريكانىڭ ءبىر بولىگى، افريكانىڭ كوپ بولىگى، اۆستراليانىڭ وڭتۇستىگى جانە انتاركتيدانىڭ كەيبىر بولىكتەرىندە ورتاشادان جوعارى تەمپەراتۋرا تىركەلدى.
