2024 -جىلدىڭ 1- جارتى جىلدىعىندا ەل ەكونوميكاسىنا 9,8 ميلليارد دوللار ينۆەستيسيا قۇيىلدى
استانا. قازاقپارات - 2024 -جىلدىڭ I جارتى جىلدىعىنىڭ قورىتىندىسى بويىنشا شەتەلدەن كەلەتىن تىكەلەي ينۆەستيسيانىڭ جالپى كولەمى 9,8 ميلليارد دوللار بولدى. بۇل تۋرالى ق ر پرەزيدەنتىنىڭ كەڭەسشىسى - باسپا ءسوز حاتشىسى بەرىك ءۋالي Egemen Qazaqstan گازەتىندە جازدى.
- جىل باسىندا، ياعني 7-اقپاندا وتكەن ۇكىمەتتىڭ كەڭەيتىلگەن وتىرىسىندا پرەزيدەنت باسەكەلەستىكتى دامىتۋ، ەكونوميكاعا مەملەكەتتىڭ ارالاسۋىن قىسقارتۋ، بيزنەس شىعىندارىن ازايتۋ ارقىلى كاسىپكەرلىك ەركىندىكتى قامتاماسىز ەتۋدى تاپسىرعان ەدى. قاسىم-جومارت توقايەۆ 10-مامىردا «ەكونوميكانى ىرىقتاندىرۋ جونىندەگى شارالار تۋرالى» جارلىققا قول قويدى. ال 2-قىركۇيەكتە قازاقستان حالقىنا ارناعان «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا پرەزيدەنت ەلىمىزدىڭ تاياۋ كەلەشەكتەگى ەكونوميكالىق دامۋىنىڭ نەگىزگى باعىت-باعدارىن ايقىندادى. ۇكىمەت جىل بويى وسى نەگىزگى مىندەتتەردى اتقارۋعا بار كۇش-جىگەرىن جۇمسادى، - دەپ جازادى بەرىك ءۋالي.
سونداي-اق وسى جىلى ەل ەكونوميكاسىنا قانشا ينۆەستيسيا تارتىلىپ جاتقانى ايتىلعان.
- 2024 -جىلدىڭ I جارتى جىلدىعىنىڭ قورىتىندىسى بويىنشا شەتەلدەن كەلەتىن تىكەلەي ينۆەستيتسيانىڭ جالپى كولەمى 9,8 ميلليارد دوللاردى قۇرادى. بۇل كورسەتكىش تاۋ-كەن ونەركاسىبى، كوتەرمە جانە بولشەك ساۋدا، وڭدەۋ ونەركاسىبى سالالارىندا كوبىرەك تىركەلدى. نەگىزگى كاپيتالعا سالىنعان ينۆەستيتسيا كولەمى قاڭتار- قاراشا ايلارىندا 15,8 تريلليون تەڭگەگە جەتتى. بۇگىندە 795,9 ميلليارد تەڭگە كولەمىندەگى سوماعا 134 جوبا ىسكە قوسىلدى، 10,1 مىڭ تۇراقتى جۇمىس ورنى قۇرىلدى. مەملەكەت باسشىسى جاڭادان جۇمىسىن باستاعان بىرنەشە ءىرى زاۋىت پەن كاسىپورىنعا ارنايى بارىپ، قىزمەتىمەن تانىستى، - دەلىنگەن ماقالادا.
ايتا كەتسەك، Kazinform ءتىلشىسى ەكونوميكالىق كورسەتكىشتەردى شولىپ شىققان بولاتىن. ساراپشى مۇنايدان تىس سەكتورلاردىڭ قارقىندى دامۋى ەل ەكونوميكاسىنىڭ وسىمىنە سەپتىگىن تيگىزگەنى تۋرالى ايتادى.
سونداي-اق بەرىك ءۋالي مەملەكەت باسشىسى قاسىم-جومارت توقايەۆتىڭ جىل بويى اتقارعان قىزمەتىنە شولۋ جاساپ، قوعامدىق- ساياسي ومىردەگى، الەۋمەتتىك-ەكونوميكالىق دامۋداعى ىرگەلى وزگەرىستەر مەن تابىستار تۋرالى باياندادى.
پرەزيدەنت بيىل جۇمىس ساپارىمەن ەلىمىزدىڭ 11 وڭىرىنە باردى. ايماقتارداعى 60 تان اسا وندىرىستىك جانە الەۋمەتتىك- مادەني نىساندارمەن تانىسىپ، جۇرتشىلىقپەن كەزدەستى.
اۆتور
ەربول جانات
