سايلاۋ-2023: پارتيالار ۇگىت-ناسيحاتتىڭ العاشقى اپتاسىن قالاي باستادى
سايلاۋعا جىبەرىلگەن 7 ساياسي پارتيا ەل نازارىن وزىنە اۋدارۋ ءۇشىن ناسيحات شارالارىن ءتۇرلى فورماتپەن باستاپ كەتتى. قازاقپارات ءتىلشىسى ولاردىڭ اپتا ىشىندە وتكىزگەن ەڭ سۇيەكتى دەگەن شارالارىنا شولۋ جاسادى.
«بايتاق»
«بايتاق» جاسىلدار پارتياسىنىڭ وكىلدەرى شىعىس قازاقستان وبلىسىنىڭ تۇرعىندارىمەن كەزدەستى. ال وسى پارتيا اتىنان ءماجىلىس دەپۋتاتتىعىنا كانديدات رەتىندە تىركەلگەن ۆلاديمير مارتەل ەكولوگيا ماسەلەسى وزەكتى بولىپ تۇرعان وسكەمەندەگى قوقىس وڭدەۋ زاۋىتىنىڭ قىزمەتكەرلەرىمەن كەزدەسۋ وتكىزدى.
بۇل زاۋىت جۇمىسىن بىلتىر باستاعان بولاتىن. جوبالىق قۋاتى ساعاتىنا 25 تونناعا دەيىن قوقىستاردى سۇرىپتاۋعا قابىلەتتى دەلىنەتىن كاسىپورىندى جەرگىلىكتى اكىمدىك ورتالىق ازياداعى تەڭدەسسىز زاۋىت رەتىندە تانىستىرىپ ءجۇر. كەزدەسۋگە قاتىسۋشىلار ەكولوگيالىق سالاعا قاتىستى كوپتەگەن ماسەلەلەردى، سونىڭ ىشىندە قوقىس وڭدەۋدەگى پروبلەمالاردى تالقىلادى.
زاۋىت جۇمىسشىلارى جالاقى تۋرالى ماسەلە كوتەرىپ، ايىنا 140-180 مىڭ تەڭگە الىپ جۇرگەندەرىن ايتقان. كانديدات قوقىس جيناۋ ماسەلەلەرىن، ەلەكتروندىق بۇيىمداردىڭ قالدىقتارىن زالاسىز قاجەتكە جاراتۋ، ماسەلەلەرى تۋرالى پايىمىن ايتىپ، زاۋىت ۇجىمىنىڭ جۇمىسى شىعىس قازاقستان ءوڭىرىنىڭ ەكولوگيالىق احۋالى ءۇشىن اسا ماڭىزدى ەكەنىن اتادى.
Respublica
Respublica پارتياسىنىڭ كانديداتتارى الماتىدا 100 دەن استام ادام جۇمىس ىستەيتىن «APR Construction» ج ش س قۇرىلىس كومپانياسىنىڭ قىزمەتكەرلەرىمەن كەزدەستى.
كەزدەسۋ اياسىندا پارتيا وكىلدەرى ەڭبەكشى جاستاردى قولداۋ مەن كاسىپكەرلەرگە مۇمكىندىك بەرۋدىڭ ماڭىزدىلىعىنا توقتالدى. ءماجىلىس دەپۋتاتتىعىنا كانديدات دينارا ناۋموۆا دارىندى جاستاردىڭ كەز كەلگەن سالادا، ونىڭ ىشىندە ساياساتتا دا تىڭ وزگەرىستەر ەنگىزە الاتىنىن ايتتى.
ونىڭ پايىمىنشا، جاستاردىڭ قولىندا قوعامدى جاقسى جاققا وزگەرتۋگە باعىتتايتىن تەتىكتىردىڭ ءبارى بار جانە ونى ءتيىمدى پادالانا ءبىلۋ قاجەت. سونداي-اق، ول ءاربىر قازاقستاندىق كەز كەلگەن تاقىرىپتاعى پروبلەماسىن جاريالاي الاتىن ارنايى پلاتفورما قۇرۋدى جوسپارلاپ وتىرعاندارىن ءمالىم ەتتى.
قازاقستان حالىق پارتياسى
ءماجىلىس دەپۋتاتتىعىنا كانديدات، قازاقستان حالىق پارتياسى ءتوراعاسىنىڭ ورىنباسارى يرينا سميرنوۆا سولتۇستىك قازاقستان وبلىسىنىڭ جۇرتشىلىعىمەن ونلاين رەجيمدە كەزدەستى.
ول پارتيانىڭ سايلاۋالدى باعدارلاماسىن تانىستىرىپ، ەلدە قالىپتاسقان جاعدايدى وزگەرتۋ جونىندەگى ناقتى ءىس-قيمىلداردى اتادى. ق ح پ «ادىلەتتى قازاقستان» تۇجىرىمداماسىن جاقتايتىنىن اتاپ ءوتتى.
سپيكەر دەنساۋلىق ساقتاۋ جانە ءبىلىم بەرۋ تاقىرىبىنا توقتالىپ، ءاربىر قازاقستاندىق تەگىن مەديتسينا الۋعا قۇقىلى ەكەنىن، ال دارىگەرلەر، مەدبيكەلەر، مۇعالىمدەر مەن باسقا دا كاسىپ وكىلدەرى لايىقتى ەڭبەكاقى الۋى ءتيىس دەپ ەسەپتەيتىنىن مالىمدەدى.
سونداي-اق، كەزدەسۋدە تۇرعىنداردى نەسيەلەندىرۋ، ا و ك دامىتۋ، كوپبالالى وتباسىلاردى، مۇمكىندىگى شەكتەۋلى بالالاردى تاربيەلەپ وتىرعان وتباسىلاردى قولداۋ، قولجەتىمدى تۇرعىن ءۇي سالۋ جانە ت. ب. ماسەلەلەر تالقىلاندى.
«اق جول»
ازات پەرۋاشيەۆ باستاعان «اق جول» دەمپارتياسىنىڭ رەسپۋبليكالىق شتابىنىڭ مۇشەلەرى الماتى وبلىسىنا باردى. پارتيا وكىلدەرى جەتىسۋ وبلىسىنىڭ ورتالىعى قونايەۆ قالاسىندا «ماريەۆەن فۋد» كومپانياسىنىڭ ەڭبەك ۇجىمىمەن كەزدەستى.
كاسىپورىندا 850 قىزمەتكەر جۇمىس ىستەيدى. شىعارعان ونىمدەرى وننان استام ەلگە ەكسپورتتالادى. كەزدەسۋ بارىسىندا پارتيا جەتەكشىسى سايلاۋدا ۇسىنىپ وتىرعان ساياسي باعدارلامانىڭ باسىم باعىتتارى تۋرالى ايتىپ بەردى. سونداي-اق، ول ءادىل باسەكەلەستىك، الەۋمەتتىك ساياسات، سىبايلاس جەمقورلىققا قارسى كۇرەس، كونستيتۋتسيالىق رەفورما جانە شەتەلگە زاڭسىز اكەتىلگەن قاراجاتتى ەلگە قايتارۋ ماسەلەلەرىنە ەگجەي-تەگجەيلى توقتالدى.
كەزدەسۋگە جينالعان حالىق كەدەندىك ساياساتتى قايتا قاراۋ، الەۋمەتتىك ادىلەتتىلىك، اۋىل شارۋاشىلىعىندا ءونىم شىعارۋشىلاردىڭ سۋبسيديا ارقىلى قولداۋ ساياساتىن ساۋاتتى ءارى تۇراقتى ۇيىمداستىرۋ، شارۋالاردى جاڭا تەحنيكامەن قامتاماسىز ەتۋ، سالاداعى ماشينالار پاركىن جاڭارتۋ ماسەلەلەرىن قوزعادى.
«اۋىل»
«اۋىل» پارتياسى الماتى قالاسىنداعى «سايران» جانە «ماسكەۋ» مەتروبەكەتتەرىندە «ونىمدەر سورەلەردە وسپەيدى» تاقىرىبىندا فوتوكورمە ۇيىمداستىردى. شاراعا ءماجىلىس دەپۋتاتتىعىنا كانديدات - ايبىن تورەحانوۆ، جاندوس تۇرسىنعاليەۆ، قانتاي الىبەك، الماس مۇحامەتوۆ، ءىلياس دوسحوجايەۆ، اننا دانچەنكو جانە قاراقات ابدەن قاتىستى.
ق ر پارلامەنتى ءماجىلىسىنىڭ دەپۋتاتتىعىنا «اۋىل» حدپپ اتىنان تۇسەتىن كانديداتتار «ونىمدەر سورەلەردە وسپەيدى» تاقىرىبىندا ۇيىمداستىرىلعان فوتوكورمە اياسىندا قالا تۇرعىندارىنا پارتيا سايلاۋالدى باعدارلاماسىنىڭ نەگىزگى باعىتتارىن ءتۇسىندىردى. پارتيانىڭ ازىق- تۇلىك باعالارىن تۇراقتاندىرۋ بويىنشا قولداناتىن تاسىلدەرى جايلى ايتتى. ازىق-تۇلىكتىڭ شىعۋ توركىنىنەن تۇسىنىگى جوق، ەل ازىق-تۇلىك قاۋىپسىزدىگىن دۇكەن قامتاماسىز ەتەدى دەپ ەسەپتەيتىن بۇگىنگى بۋىننىڭ جەتەسىنە جەتەردەي ۇگىت-ناسيحات جۇمىستارىن جۇرگىزدى.
«AMANAT»
«Amanat» پارتياسى استانادا ەلدىڭ تۇكپىر- تۇكپىرىنەن كەلگەن 800 دەن استام قاتىسۋشىنىڭ باسىن ايەلدەر فورۋمىندا قوستى. جيىنعا بەلگىلى ساياسي جانە قوعام قايراتكەرلەرى، كوپبالالى انالار، كاسىپكەرلىك، ءبىلىم بەرۋ سياقتى جانە باسقا دا سالالاردىڭ وكىلدەرى قاتىستى.
شارا بارىسىندا «Amanat» پارتياسى ايەلدەردىڭ قوعامداعى ءرولىن، ولاردىڭ ءوز قابىلەت-قارىمىن ىسكە اسىرۋ جانە ەلدىڭ ساياسي ومىرىنە بەلسەندى ارالاسۋ مۇمكىندىگىن ارتتىرۋعا باعىتتالعان باستامالار تالقىلاندى.
پارتيانىڭ رەسپۋبليكالىق سايلاۋالدى شتابىنىڭ باسشىسى ەرلان قوشانوۆ ايەلدەردىڭ مەملەكەتتىك باسقارۋ ىسىنە جانە قوعامدىق ومىرگە ارالاسۋىن كەڭەيتۋ قاجەت ەكەنىن اتاپ ءوتتى.
جالپى، پارتيا جاقسى جالاقى مەن جوعارى لاۋازىم ادامنىڭ جىنىسىنا ەمەس، داعدىسىنا قاراي بەرىلەتىن مادەنيەت قالىپتاستىرۋعا نيەتتى. پارتيا تۇرمىستىق زورلىق-زومبىلىققا قاتىستى جازانى قاتاڭداتۋدى جاقتايدى جانە كوپبالالى انالار مەن ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلاردى قولداۋ شارالارىن كۇشەيتەدى.
ج س د پ
جالپىۇلتتىق سوتسيال-دەموكراتيالىق پارتيا استانالىق سايلاۋشىلارمەن كەزدەستى. شاراعا ەلوردا ستۋدەنتتەرى مەن ۋنيۆەرسيتەت وقىتۋشىلارى قاتىستى.
پارتيا ءتوراعاسى اسحات راحىمجانوۆ بۇكىل ۇگىت-ناسيحات كەزەڭىنە ارنالعان جوسپارلارى تۋرالى مالىمەت بەرىپ، الەۋمەتتىك-ەكونوميكالىق سالادا ۇسىنىپ وتىرعان باستامالارعا توقتالدى. پارتيا وكىلدەرى قازاقستاننىڭ دامۋ ۇدەرىسى تۋرالى پىكىر-پايىمدارىن ورتاعا سالسا، كەزدەسۋگە جينالعان تۇرعىندار كوكەيدەگى سۇراقتارىن قويدى. ج س د پ وكىلدەرىنىڭ ايتۋىنشا، پارتيا ەلىمىزدىڭ ءار وڭىرىندە 500 دەن استام ءىس-شارا وتكىزۋدى جوسپارلاپ وتىر.
اسحات راحىمجانوۆ كەزدەسۋدىڭ اشىق ءارى ەركىن فورماتتا وتكەنىن اتاپ ءوتتى. جالپىۇلتتىق سوتسيال-دەموكراتيالىق پارتيانىڭ وكىلدەرى قاتىسۋشىلاردىڭ تىلەكتەرى مەن سۇراقتارىن تىڭداپ، ولارعا جاۋاپ بەردى.
