حالىقارالىق ۆاليۋتا قورى 2023-جىلى الەمدىك ەكونوميكا بولجامىن ناشارلاتپايدى
حالىقارالىق ۆاليۋتا قورىنىڭ (ح ۆ ق) ديرەكتورى كريستالينا گەورگيەۆا وسىلاي دەپ پايىمدادى، دەپ حابارلايدى قازاقپارات Deutsche Welle-گە سىلتەمە جاساپ.
الەمدىك ەكونوميكاداعى قيىن كەزەڭ جالعاسىپ جاتقانىنا قاراماستان، حالىقارالىق ۆاليۋتا قورى (ح ۆ ق) 2023-جىلى جاھاندىق ەكونوميكا ءوسىمى (قازىر %2,7) تۋرالى بولجامداردى كەزەكتى مارتە تومەندەتپەك ەمەس.
كريستالينا گەورگيەۆانىڭ ايتۋىنشا، 2023-جىل الەمدىك ەكونوميكا ءۇشىن كەزەكتى قيىن جىل بولادى جانە ينفلياتسيانى جەڭۋ مۇمكىن بولمايدى، الايدا ەگەر كۇتپەگەن وقيعالار بولماسا، بولجامدى ناشارلاتۋدىڭ قاجەتى تۋىندامايدى.
ح ۆ ق باسشىسى قازىرگى الەم داعدارىستارعا كوبىرەك بەيىم ەكەنىن جانە الەمدىك قاۋىمداستىق ەڭ كۇتپەگەن تاۋەكەلدەرگە، اتاپ ايتقاندا كليماتتىق اپاتتار مەن كۇشتى كيبەرشابۋىلدارعا دايىن بولۋى كەرەك ەكەنىن اتاپ ءوتتى. سونىمەن قاتار، مۇناي باعاسى تۋرالى الاڭداۋشىلىق اقتالماعانىن جانە ەڭبەك نارىعى تۇراقتىلىقتى كورسەتەتىنىنە توقتالدى.
«ەڭبەك نارىعىنىڭ تۇراقتىلىعى - جاعىمدى جاڭالىق. ادامداردىڭ جۇمىسى باردا، ولار باعانىڭ قىمباتتىعىنا قاراماستان اقشا جۇمساي بەرەدى... بۇل ەكونوميكاعا كومەكتەستى»، - دەپ كەلتىرەدى Reuters اگەنتتىگى گەورگيەۆانىڭ ءسوزىن.
بۇعان دەيىن، 11- قازاندا ح ۆ ق 2023-جىلى جاھاندىق ەكونوميكانىڭ ءوسۋ بولجامىن 2,9 دان %2,7 عا دەيىن تومەندەتتى.
«قىسقاشا ايتقاندا، قيىندىق ءالى الدا، ال ادامدار 2023-جىلدى رەتسەسسيا رەتىندە قابىلدايدى»، - دەپ اتاپ وتكەن ەدى سول كەزدە ح ۆ ق زەرتتەۋ دەپارتامەنتىنىڭ ديرەكتورى پەر-وليۆە گۋرينش.
