عالىمجان ءپىرماتوۆ: 2023 -جىلى الەمدە ينفلياتسيا باياۋلايدى

«كوپتەگەن ەلدە ينفلياتسيا نىسانالى كورسەتكىشتەردەن ارتتى. الەمدەگى مونەتارلىق ساياساتتىڭ كۇشەيۋى جانە لوگيستيكالىق پروبلەمالاردىڭ شەشىلۋى 2023 -جىلى ينفلياتسيانىڭ باياۋلاۋىنا اكەلەدى دەپ كۇتىلۋدە. ەكونوميكالىق ىنتىماقتاستىق جانە دامۋ ۇيىمىنىڭ بولجامى بويىنشا G20 ەلدەرىندە ينفلياتسيا 2022 -جىلعى 8,2 پايىزدان 2023 -جىلى 6,5 پايىزعا دەيىن تومەندەيدى»، - دەدى عالىمجان ءپىرماتوۆ.

ۇ ب ءتوراعاسىنىڭ اتاپ وتۋىنشە، ينفلياتسيا بولجامى ءبىرقاتار العىشارتقا بايلانىستى. ولار: كوروناۆيرۋستىڭ جاڭا تولقىنىنىڭ بولماۋى، ۋكرايناداعى سوعىستىڭ كۇشەيمەۋى، ەۋروپاداعى ەنەرگيا نارىعىنداعى قىسىمنىڭ تومەندەۋى. تىڭايتقىشتار باعاسىنىڭ ءوسۋى، قولايسىز كۇن رايىنىڭ قاتەرى قوسىمشا پروينفلياتسيالىق فاكتورلار سانالادى.

«ەكونوميكالىق ىنتىماقتاستىق جانە دامۋ ۇيىمى ناقتى مولشەرلەمەگە قاتىستى بولجامدى كورسەتكىشتەردىڭ وڭ بولۋىن ەسكەرە كەلە، ينفلياتسيالىق قىسىمدى تومەندەتۋ ءۇشىن پايىزدىق مولشەرلەمەلەردى ودان ءارى كوتەرۋدى ۇسىنادى. سونىمەن قاتار، ەكونوميكالىق ىنتىماقتاستىق جانە دامۋ ۇيىمىنىڭ پىكىرىنشە، سالىق- بيۋدجەت شارالارىندا ينفلياتسيا جوعارى بولعان كەزەڭدە بۇدان بىلاي تۇراقتى ىنتالاندىرۋدان باس تارتۋ جانە قارجىلىق تۇراقتىلىقتى قامتاماسىز ەتۋ قاجەتتىلىگى ەسكەرىلۋگە ءتيىس ەكەنى ماڭىزدى»، - دەدى ول.

الەمدەگى ورتالىق بانكتەر ينفلياتسيامەن كۇرەستە اقشا- كرەديت ساياساتىن سينحروندى تۇردە كۇشەيتۋدى جالعاستىرىپ كەلەدى.

«الەمدەگى ورتالىق بانكتەر ينفلياتسيامەن كۇرەستە اقشا- كرەديت ساياساتىن سينحروندى تۇردە كۇشەيتۋدى جالعاستىرىپ كەلەدى: ا ق ش فەدەرالدى رەزەرۆتىك جۇيەسى قىركۇيەكتە مولشەرلەمەنى ءۇشىنشى رەت 75 بازيستىك تارماققا، ەۋروپا ورتالىق بانكى مولشەرلەمەنى 75 بازيستىك تارماققا كوتەردى. بۇل مەملەكەتتىك باعالى قاعازدار كىرىستىلىگىنىڭ بۇرىن- سوڭدى بولماعان وسۋىنە جانە جارتى عاسىردا العاش رەت وبليگاتسيالار نارىعىنىڭ تومەندەۋىنە اكەلدى»، - دەدى عالىمجان ءپىرماتوۆ.

ونىڭ دەرگىنشە، ا ق ش- تىڭ 10 جىلدىق مەملەكەتتىك باعالى قاعازدارىنىڭ كىرىستىلىگى 1,51 پايىزدان 3,83 پايىزعا دەيىن 2,32 پايىزدىق تارماققا ءوستى. ا ق ش دوللارىنىڭ يندەكسى جىل باسىنان 17,2 پايىزعا ارتى.

«ينۆەستورلار ۇلى بريتانيانىڭ فيسكالدىق ىنتالاندىرۋ بويىنشا جاريالاعان جوسپارلارىن تەرىس قابىلدادى جانە ول فۋنت ستەرلينگ پەن سول ەلدەگى مەملەكەتتىك باعالى قاعازداردىڭ قۇلدىراۋىنا اكەلدى. قارجىلىق شارتتاردى كۇشەيتۋ جانە رەتسەسسيانىڭ ءوسىپ كەلە جاتقان تاۋەكەلدەرى اياسىندا قورعانىش اكتيۆتەرىنە كوشۋ جالعاسۋدا. قور نارىقتارى قاتارىنان 3 توقسان بويى تومەندەپ، 2008 -جىلدان باستاپ ەڭ ۇزاققا سوزىلعان قۇلدىراۋعا جول بەردى»، - دەدى عالىمجان ءپىرماتوۆ.

اۆتور

مارلان جيەمباي