قازاقستاندا كيىكتى اتۋعا 2023-جىلعا دەيىن تىيىم سالىندى
«كيىكتەردىڭ سانىن كوبەيتىپ، ولاردى ساقتاۋ ماقساتىندا ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتىنىڭ بۇيرىعىمەن قازاقستان رەسپۋبليكاسىنىڭ اۋماعىندا كيىكتەردى 2023-جىلعا دەيىن اتۋعا تىيىم سالىندى (زاڭ بويىنشا كيىكتەردى جانە ولاردىڭ بولىكتەرىن، دەريۆاتتارىن پايدالانۋعا تىيىم سالۋ)»، - دەدى كوميتەتتىڭ باسپا ءسوز حاتشىسى ساكەن دىلداحمەت .
ونىڭ حابارلاۋىنشا، ق ر ب ع م عىلىم كوميتەتىنىڭ زوولوگيا ينستيتۋتى كيىكتى اتۋعا 2023-جىلعا دەيىن تىيىم سالۋ تۋرالى كەڭەس بەرگەن. بيولوگيالىق نەگىزدەمە مەملەكەتتىك ەكولوگيالىق ساراپتامامەن ماقۇلداعان. كيىكتى اتۋعا تىيىم سالۋ تۋرالى بۇيرىق رەسمي تۇردە جاريالانعاننان كەيىن 10 كۇننىڭ ىشىندە (20 - اقپاندا) كۇشىنە ەنەدى.
«وزدەرىڭىز بىلەتىندەي، قازاقستاندا 2015-جىلى 150 مىڭنان استام كيىك قىرىلعان ەدى. سول سەبەپتى 2015-جىلدان باستاپ 2019-جىلدىڭ 31 - جەلتوقسانعا دەيىن كيىكتەردى اتۋعا تىيىم سالىنعان ەدى. ەندى كيىكتىڭ سانىن كوبەيتۋ ءۇشىن بۇل مەرزىم 2023-جىلعا دەيىن ۇزارتىلدى. جالپى كيىك قىزىل كىتاپقا ەنگىزىلمەگەن. زاڭمەن شەكتەپ قانا قويماي، بۇل باعىتتا ءارتۇرلى جۇمىستاردى جۇرگىزىپ جاتىرمىز. ماقسات - كيىك سانىن 500 مىڭعا جەتكىزۋ»، - دەيدى ساكەن دىلداحمەت.
