ءبىز ءۇشىن 2022-جىل تۇبەگەيلى وزگەرىستەر جىلى بولدى - ماۋلەن اشىمبايەۆ

الەۋمەتتىك جەلىدەگى پاراقشاسىندا وسىلاي دەپ وي تۇيگەن سەنات سپيكەرى ماۋلەن اشىمبايەۆ 2023-جىل ەلىمىز ءۇشىن تابىستى، بەرەكەلى، قۇتتى جىل بولاتىنىنا سەنەتىنىن جەتكىزدى، دەپ حابارلايدى قازاقپارات.

بارشاڭىزدى كەلىپ جەتكەن جاڭا 2023-جىلمەن شىن جۇرەكتەن قۇتتىقتايمىن! بۇل - بارىمىزگە كوتەرىڭكى كوڭىل-كۇي سىيلايتىن، ءارقايسىمىز ەرەكشە قارسى الاتىن شاتتىققا تولى مەرەكە، -

دەپ جازعان سەنات ءتوراعاسى.

وسى ساتتە وتكەندى وي ەلەگىنە سالىپ، الداعى كۇندەردەن ايرىقشا ءۇمىت كۇتەتىنىمىزگە توقتالادى.

ءوتىپ بارا جاتقان 2022-جىل ەلىمىز ءۇشىن وڭاي باستالعان جوق. قاسىرەتتى قاڭتار وقيعاسى ەلدىگىمىز بەن ەگەمەندىگىمىزگە ۇلكەن قاۋىپ ءتوندىردى. ءبىز، شىن مانىندە، تاۋەلسىزدىك جىلناماسىندا بۇرىن-سوڭدى بولماعان سىن-قاتەرمەن بەتپە-بەت كەلدىك. دەگەنمەن، مەملەكەت باسشىسى قاسىم-جومارت كەمەل ۇلى توقايەۆتىڭ باتىل شەشىمدەرى مەن حالىقتىڭ ىنتىماعىنىڭ ارقاسىندا قيىندىقتاردى ەڭسەرە بىلدىك. تاۋەلسىزدىگىمىزدى نىعايتىپ، مەملەكەتتىلىگىمىزدى ساقتاۋ جولىندا ناقتى قادامدار جاسادىق. سونىڭ ناتيجەسىندە بۇگىندە ەلىمىزدە كەشەندى رەفورمالار جۇيەلى تۇردە ىسكە اسىرىلىپ جاتىر. جالپى، 2022-جىل ءبىز ءۇشىن تۇبەگەيلى وزگەرىستەر جىلى بولدى دەسەك، ارتىق بولا قويماس، - دەيدى ول.

سەنات سپيكەرى الداعى ۋاقىتتا قولعا العان باستامالار لايىقتى جالعاساتىنىنا سەنىمدىلىك تانىتادى.

2023-جىل ەلىمىز ءۇشىن تابىستى، بەرەكەلى، قۇتتى جىل بولادى دەپ سەنەمىز. ول ءۇشىن بارلىق ىستە جۇدىرىقتاي جۇمىلىپ ارەكەت ەتۋ اسا ماڭىزدى. سوندا عانا كوزدەگەن ماقسات-مىندەتتەرىمىزگە قول جەتكىزەمىز. جاڭا جىلدا ءار وتباسىنا قۋانىش، جاقسىلىق، اماندىق تىلەيمىن! ەگەمەن ەلىمىز ءوسىپ-وركەندەي بەرسىن! ءاردايىم ىرگەمىز ءبۇتىن، بىرلىگىمىز بەكەم بولسىن! جاڭا جىلدارىڭىزبەن! - دەپ تىلەك بىلدىرەدى ماۋلەن اشىمبايەۆ.