17:40, 27 - قازان 2022 | GMT +6
سايلاۋ-2022: قاراقات ابدەن ەكىباستۇزداعى پەرزەنتحانادا كەزدەسۋ وتكىزدى
ەكىباستۇز. قازاقپارات - پرەزيدەنتتىككە كانديدات قاراقات ابدەن بۇگىن ەكىباستۇز قالالىق اۋرۋحاناسى جانىنداعى پەرزەنتحانادا جاس انالارمەن جانە مەديتسينا قىزمەتكەرلەرىمەن كەزدەستى، دەپ حابارلايدى قازاقپارات.
ول ءوزىنىڭ سايلاۋالدى باعدارلاماسىنىڭ نەگىزگى باعىتتارىن تانىستىرىپ، اق حالاتتى ابزال جانداردىڭ ۇسىنىس-پىكىرلەرىن تىڭدادى. سونداي-اق، پەرزەنتحانانىڭ باس دارىگەرىمەن بىرگە جاس انالار مەن سابيلەردىڭ جاعدايىن ءبىلۋ ءۇشىن پالاتالاردى ارالادى.
ۇمىتكەردىڭ ەكىباستۇز قالاسىنداعى سەنىمدى وكىلى انار ايدارحانوۆا مالىمدەگەندەي، قالادا ق. ابدەننىڭ سايلاۋالدى شتابى تۇرعىنداردى اقپاراتتاندىرۋ بويىنشا جۇمىس ىستەپ جاتىر.
ەسكە سالساق، قاراقات ابدەن بۇعان دەيىن اقمولا وبلىسى، قاراعاندى جانە استانا قالالارىنىڭ تۇرعىندارىمەن جۇزدەسكەن ەدى. الداعى ۋاقىتتا ونىڭ پاۆلودار، اباي جانە الماتى وبلىسىنىڭ سايلاۋشىلارىمەن كەزدەسۋ وتكىزۋى جوسپارلانعان.