ۇلتتىق ۇلان ساربازدارى قىرعىزستانداعى «كوبالت-2022» وقۋ-جاتتىعۋىنا قاتىسىپ جاتىر
جاتتىعۋ ۇ ق ش ۇ ۇجىمدىق قاۋىپسىزدىك جۇيەسىنىڭ كۇشتەرى مەن قۇرالدارىن بىرلەسىپ دايارلاۋ جوسپارىنا سايكەس ۇيىمداستىرىلدى.
وعان سونداي-اق، جەدەل دەن قويۋ ۇجىمدىق كۇشتەرىنىڭ قۇرامىنا كىرەتىن ارنايى ماقساتتاعى كۇشتەردىڭ قۇرالىمدارى قاتىسىپ جاتىر. وقۋ-جاتتىعۋ بارىسىندا ۇيىمعا مۇشە مەملەكەتتەردىڭ ارنايى ماقساتتاعى اسكەرلەرىنىڭ جيىنتىق توپتارى باندالىق قۇرىلىمداردى، تەرروريستىك توپتاردى ىزدەۋ، بۇعاتتاۋ جانە بەيتاراپتاندىرۋ جونىندەگى جاتتىعۋلاردى جانە قولدانبالى جەدەل-جاۋىنگەرلىك مىندەتتەردى ورىندايدى.
سونداي-اق، ەسىرتكى كونترابانداسىنىڭ ارنالارىن جابۋ جانە ەسىرتكى ساقتاۋ قويمالارىن، ءوندىرۋ زەرتحانالارىن تابۋ مەن جويۋدى جۇزەگە اسىرادى.
وقۋ-جاتتىعۋ جوسپارى بويىنشا ارنايى وپەراتسيانى جوسپارلاۋ، ءوزارا ءىس-قيمىلدى ۇيىمداستىرۋ جانە ارتەكتى كۇشتەر مەن قۇرالداردى باسقارۋ ماسەلەلەرى بويىنشا جەدەل دەن قويۋ ۇجىمدىق كۇشتەرىنىڭ جەدەل شتابىمەن كوماندالىق-شتابتىق جاتتىعۋ كوزدەلگەن.
سونىمەن قاتار، وقۋ-جاتتىعۋدىڭ سوڭىندا ءتۇرلى قارۋدان اتۋ بويىنشا جارىستار وتەدى.
