بەيجىڭ-2022: قازاق سپورتشىلارىنا جۇلدەنىڭ اۋىلى الىستاپ بارادى
قازاق سپورتشىلارىنا جۇلدەنىڭ اۋىلى الىستاپ بارا جاتقانداي. اق وليمپيادا ويىندارىنىڭ اياقتالۋىنا ساناۋلى كۇندەر عانا قالدى. ءبىز ءۇمىت ارتقان سپورت تۇرلەرىنەن سىنعا تۇسەتىن سپورتشىلارمىزدىڭ بارلىعى جارىستى ءساتسىز اياقتاپ جاتىر.
بۇگىن دە ەل اتىنان سىنعا تۇسكەن اتلەتتەرىمىز كوز قۋانتارلىق ناتيجەلەرگە قول جەتكىزە المادى. ايتالىق، بۇگىن ەرلەر اراسىندا تاۋ شاڭعى سپورتىنىڭ سلالوم باعدارلاماسىنان سىنعا تۇسكەن زاحار كۋچين ءبىرىنشى مۇمكىندىگىندە مارە سىزىعىن 1:03,68 كورسەتكىشىمەن 43-بولىپ كەستى. ناتيجەسىندە ۇزدىك 30 سپورتشى قاتارىنا كىرە المادى.
ال ەكىنشى مۇمكىندىگىندە مارە سىزىعىن 2:02,66 ۋاقىت كورسەتكىشىمەن 36- بولىپ كەسىپ ءوتتى. وسىلايشا جارىستى ءساتسىز اياقتادى.
بۇل زاحار كۋچيننىڭ بەيجىڭ وليمپياداسىنداعى سوڭعى جارىسى ەدى.
سپورتتىڭ بۇل تۇرىنەن باس جۇلدەنى فرانسيالىق كلەمەنت نوەل (1:44,09) جەڭىپ السا، ەكىنشى ورىنعا اۆستريا وكىلى يوحاننەس شترولتس (1:44,70-) قول جەتكىزدى. ال ۇزدىك ءۇشىنشى ورىنعا نورۆەگيادىق سەباستيان فوسس سۋليەۆوگ (1:44,79-) يە بولدى.
سونداي-اق، بۇگىن شاڭعى جارىسىنان ايەلدەر اراسىنداعى كوماندالىق سپرينتتەن جارتىلاي فينالدىق جارىستار ءوتتى. بۇل سىندا ەل نامىسىن نادەجدا ستەپاشكينا مەن كسەنيا شالىگينا قورعادى.
وكىنىشكە قاراي ەكەۋى مارە سىزىعىن 24:57,5 ۋاقىت كورسەتكىشىمەن 10-شى بولىپ كەسىپ ءوتتى. وسىلايشا وتانداستارىمىز فينالعا وتە المادى.
جارىس سوڭىندا بۇگىن شورت-ترەكتەن سىنعا تۇسكەن ولگا تيحونوۆادان ءۇمىت كۇتكەمىز. ول 1500 قاشىقتىقتا سىنعا ءتۇستى. اتالعان قاشىقتىقتى وتانداسىمىز 2:23,48 ۋاقىت كورسەتكىشىمەن ءتورتىنشى بولىپ كەسىپ ءوتتى.
الايدا، ونىڭ جارىس بارىسىندا ەرەجە بۇزعانى انىقتالىپ جارىستان شەتتەتىلدى. وسىلايشا ول بەيجىڭدەگى وليمپيادا ويىندارىن جۇلدەسىز اياقتادى.
بۇل قازاقستاندىق سپورتشىلاردىڭ شورت-ترەكتەن بەيجىڭ وليمپياداسىنداعى سوڭعى جارىسى ەدى.
ايتا كەتەلىك، شورت-ترەكتەن قازاقستان كومانداسىنىڭ ەڭ ۇزدىك ناتيجەسىن ابزال اجىعاليەۆ تىركەدى. ول 500 مەترگە جۇگىرۋدەن ا فينالىندا سىنعا ءتۇسىپ، ءتورتىنشى ورىن يەلەندى.
بەيجىڭ وليمپياداسى 20- اقپاندا مارەسىنە جەتەدى.
اۆتور: كۇنسۇلتان وتارباي
