بەيجىڭ-2022: قىزداردىڭ كورسەتكىشتەرىنە ريزامىن - فريستايل-اكروباتيكادان اعا جاتتىقتىرۋشى

«الدىمەن ايتارىم، فريستايل-اكروباتيكا سپورتى ءبىر ورىندا تۇرعان جوق. جىل ساناپ جەتىلە ءتۇسىپ جاتىر. بۇرىن قىزدار ءۇشىن سەكىرۋ كورسەتكىشى باسقاشا بولسا، قازىر قىزدار ۇلدارمەن بىردەي دەڭگەيدە مىقتىلىعىن دالەلدەۋ كەرەك. ياعني بۇرىن ەكەۋلىك دەڭگەيدە سەكىرسە، ەندى ۇشەۋلىك سەكىرۋ قاجەت. بەيجىڭ وليمپياداسىنا سوڭعى 2 جىل تىنىمسىز دايىندالدىق. فريستايل- اكروباتيكادان وتكەن جىلى بولعان الەم كۋبوگىندا ءبىزدىڭ سپورتشىلار وتە جاقسى ناتيجە كورسەتتى»، - دەدى ج. اراپبايەۆا بەيجىڭنەن تىكەلەي ەفيردە وتكەن باسپا ءسوز ءماسليحاتىندا.
«نەگىزى ءبىز فريستايل-اكروباتيكادان فينالعا شىعۋدى ماقسات تۇتىپ كەلگەنبىز. ءوز باسىم قىزداردى ماقتان تۇتامىن، كورسەتكىشتەرىنە ريزامىن. ءبىزدىڭ سپورتشى قىزدار باتىل، ەرجۇرەك»، - دەيدى ول.
سونداي-اق، بريفينگتە بەيجىڭ وليمپياداسىندا فريستايل- اكروباتيكادان فينالعا شىققان جەرلەسىمىز اقمارجان قالمۇرزايەۆا جارىستان كەيىنگى اسەرىمەن ءبولىستى.
«جارىس كەزىندە قوبالجۋ بولدى. سەبەبى حالىقارالىق وليمپيادانىڭ فينالىنا ءبىرىنشى رەت شىعۋىم. قوبالجۋدان كەيىن دە سايىس قيىنعا سوقتى دەپ ويلايمىن. بىرنەشە قاتەلىك جىبەردىم. دەگەنمەن جولدان تايىپ كەتپەي سوڭىنا دەيىن باردىم. شاڭعىم كەتىپ قالعاندا جولدان شىعا سالسام بولار ەدى، ءبىراق مەن ونەر كورسەتۋدى جالعاستىرا بەردىم. قۇلاماۋعا تىرىستىم، ياعني قولىمنان كەلگەننىڭ ءبارىن ىستەدىم. تورەشىلەردىڭ ءوز شەشىمى بار، 11 ورىنعا لايىق بولدىم»، - دەيدى سپورتشى.
ەسكە سالا كەتسەك، قىتاي استاناسى بەيجىڭ قالاسىندا ءوتىپ جاتقان اق وليمپيادا ويىندارىندا فريستايل- اكروباتيكاسىنان اقمارجان قالمۇرزايەۆا فينالعا وتكەن ەدى. دەگەنمەن جەرلەسىمىز فينالدا ءسۇرىنىپ، جۇلدەگە ىلىكپەي قالدى.
اۆتور: ءالي يبرايەۆ