بەيجىڭ- 2022: قازاقستاننىڭ فريستايل اكروباتيكادان كوماندالىق جارىسقا قاتىسپاۋ سەبەبى ايتىلدى

نۇر-سۇلتان. قازاقپارات - بەيجىڭ وليمپياداسىندا قازاقستاندىق سپورتشىلاردىڭ فريستايل اكروباتيكادان كوماندالىق جارىسقا شىقپاۋىنا قاتىستى تۇسىنىك بەرىلدى، دەپ حابارلايدى قازاقپارات ءتىلشىسى.

«ءبىز نەگىزى فريستايل اكروباتيكادان 2 سانات بويىنشا قاتىسۋىمىز كەرەك ەدى. ءبىرىنشى كوماندالىق، ەكىنشى جەكە. وكىنىشكە قاراي، كوروناۆيرۋس كەرى اسەرىن تيگىزدى. قىزدارىمىز فينليانديادا دايىندىقتا ەدى، سپورتشىلاردىڭ پ ت ر تەستى وڭ ناتيجە كورسەتتى. وڭ ناتيجە بولعاننان كەيىن ءبىز اقمارجان قالمۇرزايەۆانى سول جاقتا ۇستاپ وتىردىق. بەيجىڭگە الىپ كەلەيىك دەگەنبىز، وعان بۇل جاقتا COVID-19-عا تالاپ قاتاڭ. بىردەن كارانتينگە جاۋىپ تاستايدى»، - دەدى قازاقستاننىڭ ۇلتتىق وليمپيادا كوميتەتى سپورت ديرەكتسياسىنىڭ ديرەكتورى ەلسيار قاناعاتوۆ بەيجىڭمەن تىكەلەي ەفيردە وتكەن باسپا ءسوز ءماسليحاتىندا.

ۇلتتىق وليمپيادا كوميتەتى وكىلىنىڭ ايتۋىنشا، سپورتشىلارىمىزدىڭ فريستايل اكروباتيكادان كوماندالىق جارىسقا قاتىسا الماۋىنا قازاقستان تاراپىنان كىنا جوق.

«قوسىمشا پ ت ر تەستىن تاپسىرىپ، كوروناۆيرۋس انىقتالماعان سوڭ عانا بەيجىڭگە كەلە الدى. بۇندا كەلگەن سوڭ تاعى تەكسەرىستەن ءوتتى. ءسويتىپ فريستايل اكروباتيكادان جەكە تۇردە باعىن سىنادى. ءبىراق كوماندالىق جارىسقا قاتىسا المادىق»، - دەيدى ول. بۇعان دەيىن ەلىمىزدە بىرنەشە قىسقى سپورت ءتۇرى بويىنشا ارنايى باعدارلاما ازىرلەۋ كەرەكتىگى ايتىلدى.