بەيجىڭ-2022: قازاقستاندىق سپورتشىلاردىڭ مەدال الماۋىنا نە سەبەپ

نۇر- سۇلتان. قازاقپارات - بۇگىندە قىتايدا قىسقى اق وليمپيادا ءوتىپ جاتىر. وكىنىشكە قاراي، قازاقستاننىڭ قورجىنىندا ازىرگە جۇلدە جوق.

وسى ورايدا قازاقستاننىڭ ۇلتتىق وليمپيادا كوميتەتى سپورت ديرەكسياسىنىڭ ديرەكتورى ەلسيار قاناعاتوۆ ايتۋلى جۇلدەگە قاتىستى ءمان- جايدى ءتۇسىندىرىپ بەردى، دەپ حابارلايدى قازاقپارات ءتىلشىسى.

«ارينە، سپورتشىلارىمىزعا پاتريوتتىق سەزىم تۋرالى ۇنەمى ايتىپ وتىرامىز. جالپى قىسقى سپورت تۇرىنە كەلسەك، بىزدە 2 كەشەن بار. ءبىرى الماتىدا، ەكىنشىسى شۋچينسكىدە. جالپى ايتقاندا، قىسقى سپورت ءتۇرى مەن ءار الاڭنىڭ وزىندىك قىر- سىرى بار. ياعني سپورتشى سول جەرگە بارىپ دايىندالماسا بولمايدى. دەمەك وتاندىق سپورتشىلار شەتەلگە ءجيى شىعىپ، دايىندالۋى ءتيىس»، - دەدى ەلسيار قاناعاتوۆ بەيجىڭنەن تىكەلەي ەفيردە وتكەن باسپا ءسوز ءماسليحاتىندا.

ونىڭ ايتۋىنشا، بەيجىڭ وليمپياداسىنان كەيىن ۇلتتىق قۇرامانىڭ ونەر كورسەتۋىنە قاتىستى قورىتىندى جاسالادى.

«قىسقى وليمپياداعا 91 مەملەكەت قاتىسىپ وتىر. سونىڭ ىشىندە ءبىزدىڭ مەملەكەت ايتارلىقتاي ناتيجە كورسەتۋدە. ايتار بولساق، فريستايلدان قىزدارىمىز قانداي سەكىرۋلەر جاسادى. ونى وزدەرىڭىز كوردىڭىزدەر»، - دەيدى ول.

ايتا كەتسەك، بۇعان دەيىن ق ر ۇلتتىق وليمپيادا كوميتەتى سپورت ديرەكسياسىنىڭ ديرەكتورى ەلسيار قاناعاتوۆ قازاقستاندا سپورت سالاسى بويىنشا عىلىمي زەرتتەۋ ينستيتۋتىن قۇرۋ كەرەكتىگىن ۇسىنعان ەدى. ودان بولەك، بەيجىڭ وليمپياداسىندا شورت- ترەكتەن 500 مەترلىك قاشىقتىقتا ءتورتىنشى ورىنعا يە بولعان جەرلەسىمىز ابزال اجىعاليەۆ جارىستان كەيىنگى اسەرىمەن بولىسكەن ەدى.

اۆتور: ءالي يبرايەۆ