بەيجىڭ-2022: قازاقستاندىق شورت-ترەك شەبەرلەرى قانشا سىياقى الادى

نۇر-سۇلتان. قازاقپارات - شورت-ترەكتەن وليمپيادا ويىندارىندا ۇزدىك بەستىككە جانە تورتتىككە ەنگەن قازاقستاندىق شورت-ترەكشىلەر قانشا قارجىلاي سىياقى الادى، دەپ حابارلايدى قازاقپارات.

وسىدان ءبىر كۇن بۇرىن شورت-ترەكتەن قازقستان ۇلتتىق قۇراماسىنىڭ باس باپكەرى ءمادىعالي قارسىبەكوۆ بەيجىڭدەگى وليمپيادا ويىندارىن قورىتىندىلاپ، ءوز شاكىرتتەرىنىڭ جەتىستىگىن جوعارى باعالادى. سونداي-اق، جۇلدەلى ورىنعا سىنىق سۇيەم جەتپەي قالعاندارىنا وكىنىش تە ءبىلدىردى. بەيجىڭ وليمپياداسىندا ەل تاريحىندا العاش رەت قوس سپورتشىمىز جەكەلەي سىننىڭ فينالىنا شىقتى. جارىستىڭ العاشقى كۇندەرى ءادىل عالياحمەتوۆ ەرەكشە كوزگە تۇسكەن بولاتىن.

ول 1500 مەترلىك باسەكەنىڭ فينالىنا دەيىن جەتتى. الايدا سوڭعى مەدالعا تالاس كەزىندە 8-ساتىعى تۇراقتادى. ودان كەيىن ابزال اجىعاليەۆ 500 مەترلىك باسەكەدە 4-ورىن الدى. وسىلايشا جۇلدەلى ورىنعا ءبىر قادام ۇلگەرمەي قالدى. بۇعان قوسا، جەرلەستەرىمىز ارالاس ەستافەتادا الدىڭعى 5-تىكتەن تابىلدى. جەتىستىكتەرىنىڭ ارقاسىندا ۇلتتىق قۇراما سپورتشىلارى 70 مىڭ دوللار سىياقى الادى. اتاپ ايتساق، قازاقستاندا وليمپيادا جۇلدەگەرلەرىنەن بولەك 4-شى، 5-شى جانە 6-شى ورىن العان اتلەتتەرگە دە سىياقى بەرۋ قاراستىرىلعان.

سول سەبەپتى، ابزالعا 4-شى ورىن ءۇشىن 30 مىڭ دوللار تابىستالادى. ال ەستافەتادا ەل نامىسىن قورعاعان ابزال اجىعاليەۆ، دەنيس نيكيشا، ولگا تيحونوۆا جانە يانا حان تورتتىگىنە 10 مىڭ دوللاردان بەرىلەدى. ال وليمپيادا ويىندارىندا التىن العان سپورتشىعا 250 مىڭ، ال كۇمىس پەن قولاعا، سايكەسىنشە 150 جانە 75 مىڭ دوللاردان بەرىلەدى.

ايتا كەتەيىك، اتالعان اق وليمپيادادا ويىندارىندا ەلىمىزدىڭ نامىسىن 8 سپورت تۇرىنەن 34 سپورتشى قورعاپ جاتىر. ولار - قىسقى سپورت ويىندارىنىڭ ىشىندە سپورتتىڭ شاڭعى جارىسى، فريستايل- موگۋل، شاڭعى اكروباتيكاسى، تاۋ شاڭعىسى، شاڭعىمەن سەكىرۋ، بياتلون جانە شورت- ترەك تۇرلەرىنەن سىنعا تۇسۋدە. بەيجىڭ وليمپياداسى 20-اقپاندا مارەسىنە جەتەدى.

اۆتور: كۇنسۇلتان وتارباي