بەيجىڭ-2022: بۇگىنگى شىققان بيىگىمىز - شيرەك فينال

نۇر-سۇلتان. قازاقپارات - بۇگىن بەيجىڭ وليمپياداسىنىڭ جەتىنشى كۇنى قازاقستاندىق اتلەتتەر سپورتتىڭ ءتورت تۇرىنەن باق سىنادى، دەپ حابارلايدى قازاقپارات ءتىلشىسى.

ءتورت سپورتتان 8 سپورتشىمىز جارىس الاڭىنا شىقتى.

اتاپ ايتساق، بۇگىن جارىس الاڭىنا ءبىرىنشى بولىپ ەرلەر اراسىندا شاڭعى جارىسىنان كلاسسيكالىق ستيلدەن 15 شاقىرىمدىق باسەكە دە ۆيتالي پۋحكالو مەن ەۆگەني ۆەليچكو شىقتى.

جارىس ناتيجەسى بويىنشا جالپى جارىس جولىنا شىققان 99 شاڭعىشىلار اراسىنان ۆيتالي پۋحكالو مارەگە 25-ءشى، ال ەۆگەني ۆەليچكو 40-شى بولىپ جەتتى.

جەرلەستەرىمىز پۋحكالو ءتيىستى قاشىقتىقتى 40:39:6 ۋاقىتتا باعىندىرسا، ۆەليچكو 41:27:3 ۋاقىتتا ءجۇرىپ ءوتتى.

بۇل دودانىڭ باس جۇلدەسىن فينليانديالىق يۆو نيسكانەن جەڭىپ الدى. كۇمىستى رەسەيلىك الەكساندر بولشۋنوۆ قانجىعاسىنا بايلاسا، ۇزدىك ۇشتىكتى نورۆەگيالىق يوحاننەس كلەبو ەنشىلەپ بەيجىڭ وليمپياداسىنىڭ قولا جۇلدەگەرى اتاندى.

ودان كەيىن بياتلوننان ايەلدەر اراسىنداعى سپرينت جارىسى باستالدى. باعدارلامانىڭ بۇل تۇرىندە قازاقستان اتىنان جالعىز گالينا ۆيشنيەۆسكايا-شەپورەنكو ەل نامىسىن قورعادى.

وكىنىشكە قاراي وتانداسىمىز جالپى ەسەپتە جارىسقا قاتىسقان 60 سپورتشىنىڭ ىشىنەن 52- ورىنعا يە بولدى. جەرلەسىمىز جەڭىمپازدان (1+0)2:38,3+ مينۋتقا قالىپ قويدى.

اتالعان سىندا بەيجىڭ وليمپيداسىنىڭ التىن مەدالىن نورۆەگيا سپورتشىسى قانجىعاسىنا بايلادى. كۇمىس مەدالگە شۆەتسيا بياتلونشىسى قول جەتكىزسە، ۇزدىك ۇشتىكتى يتاليالىق اتلەت تۇيىندەدى.

ودان كەيىنگى كەزەك قازاقستاندىق شورت-ترەكشىلەرگە دە كەلىپ جەتتى. 500 مەتر قاشىقتىقتا ەل نامىسىن ءبىر ەمەس ءۇش اتلەتىمىز قورعادى. ناتيجەسىندە ۇشەۋى دە العاشقى ىرىكتەۋ سىنىنان سۇرىنبەي ءوتىپ، شيرەك فينالدىق باسەكگە جولداما الدى.

جەرلەستەرىمىز اراسىنان مۇز ايدىنعا ءبىرىنشى بولىپ شىققان ءادىل عالياحمەتوۆ 500 مەتردى 40,74 سەكۋندتا جۇگىرىپ وتسە، دەنيس نيكيشا 40,482 سەكۋندتا باعىندىرىپ شيرەك فينالعا جولداما الدى. ال ابزال اجىعاليەۆ اتالعان قاشىقتىقتى 40.87 سەكۋندتا باعىندىردى.

عالياحمەتوۆ ءوز توبىندا ەكىنشى ورىنعا تابان تىرەسە، نيكيشا مەن اجىعاليەۆ ءبىرىنشى ورىننان كورىندى.

وسىلايشا، قازاقستاندىق سپورتشىلار اۆتوماتتى تۇردە كەلەسى كەزەڭگە ءوتتى. ەندى شورت-ترەكشىلەرىمىز شيرەك فينال، جارتىلاي فينال جانە فينال كەزەڭدەرىن 13 - اقپاندا وتكىزەدى.

شورت-ترەكشىلەرىمىزدىڭ ءساتتى جەڭىسىنەن كەيىن، ىلە-شالا ۇلكەن ترامپليننەن سەكىرۋدەن ىرىكتەۋ جارىسىنىڭ ناتيجەلەرى دە انىقتالدى.

بۇل سپورت تۇرىنەن ەل نامىسىن دانيل ۆاسيليەۆ پەن سەرگەي تكاچەنكو قوعاعان بولاتىن. وكىنىشكە قاراي، ەكەۋى دە ءۇمىتتى اقتاي المادى.

ناقتىراق ايتساق، ەكەۋى دە كەلەسى كەزەڭگە جولداما الاتىن 50 سپورتشىنىڭ قاتارىنا ىلىگە المادى. ۆاسيليەۆ 69.4 ۇپايمەن (103 م) 51-ورىنعا يە بولسا، تكاچەنكو 54-ورىنعا (60,7 ۇپاي، 98,5 م) تابان تىرەدى.

ەندىگى ءۇمىت - ەرتەڭگى جارىس جولىنا شىعاتىن سپورتشىلارىمىزدا.

اۆتور: كۇنسۇلتان وتارباي