بەيجىڭ-2022: قازاقستاندىق شورت-ترەكشىلەر شيرەك فينالعا شىقتى

نۇر-سۇلتان. قازاقپارات - بۇگىن بەيجىڭدە ءوتىپ جاتقان وليمپيادادا قازاقستاندىق شورت-ترەكشىلەر 500 مەتر قاشىقتىقتا شيرەك فينالعا ءوتتى، دەپ حابارلايدى قازاقپارات ءتىلشىسى.

اتالعان قاشىقتىقتا ءبىر ەمەس، ءۇش بىردەي شورت-ترەكشىمىز باق سىنادى. جەرلەستەرىمىز اراسىنان مۇز ايدىنعا ءبىرىنشى بولىپ شىققان ءادىل عالياحمەتوۆ 500 مەتردى 40,74 سەكۋندتا جۇگىرىپ وتسە، دەنيس نيكيشا 40,482 سەكۋندتا باعىندىرىپ شيرەك فينالعا جولداما الدى. ال ابزال اجىعاليەۆ اتالعان قاشىقتىقتى 40.87 سەكۋندتا باعىندىردى.

ناتيجەسىندە ۇشەۋى دە شيرەك فينالدا سىنعا تۇسۋگە مۇمكىندىك الدى.

عالياحمەتوۆ ءوز توبىندا ەكىنشى ورىنعا تابان تىرەسە، نيكيشا مەن اجىعاليەۆ ءبىرىنشى ورىننان كورىندى.

وسىلايشا، قازاقستاندىق سپورتشىلار اۆتوماتتى تۇردە كەلەسى كەزەڭگە ءوتتى.

ايتا كەتەلىك، شيرەك فينال، جارتىلاي فينال جانە فينال كەزەڭدەرى 13 - اقپانعا جوسپارلانعان.

ەستەرىڭىزگە سالا كەتەيىك، وسىعان دەيىن 23 جاستاعى ءادىل عالياحمەتوۆ شورت-ترەكتەن 1500 مەترگە جۇگىرۋدە وليمپيادا ويىندارىن 8-ورىنمەن اياقتاعان بولاتىن.

اۆتور: كۇنسۇلتان وتارباي