بەيجىڭ-2022: بۇگىن مەدال الۋعا ءۇمىت ويانعان كۇن بولدى

نۇر-سۇلتان. قازاقپارات - بۇگىن بەيجىڭ وليمپياداسىنىڭ بەسىنشى كۇنى جانكۇيەرلەرگە مەدالعا دەگەن ءۇمىت ويانعان كۇن بولدى، دەپ حابارلايدى قازاقپارات ءتىلشىسى.

بۇگىن، ياعني 9- اقپان كۇنى قازاقستاندىق اتلەتتەر سپورتتىڭ ءۇش ءتۇرى بويىنشا جارىس جولىنا شىقتى.

جارىس كەستەسىنە سايكەس ەڭ اۋەلى تاۋ شاڭعىسىنان ايەلدەر اراسىنداعى باسەكەگە كوز تىكتىك. بۇل سىندا وليمپيادا دەبيۋتانتى 18 جاستاعى الەكساندرا ترويتسكايا ەل نامىسىن قورعادى. وكىنىشكە قاراي جاس سپورتشىمىز العاشقى وليمپياداسىندا مارە سىزىعىنا جەتە الماي، جارىس جولىنان شىعىپ قالدى.

ودان كەيىن شاڭعى قوسسايىسىنان وتكەن جارىستارعا ۇمىتپەن قارادىق. بۇل دودادا شىڭعىس راكپاروۆقا ءۇمىت ارتقان ەدىك. ول ءبىرىنشى سايىسىندا ورتاشا ترامپليننەن 79,5 مەترگە سەكىرىپ، 38-ورىنعا (69,9 ۇپاي) يە بولسا، ەكىنشى 10 شاقىرىمدىق ءىز كەسۋ جارىسىندا جەڭىمپازدان جەتى مينۋتقا ارتتا قالىپ، جالپى ەسەپتە 41-ورىنعا يە بولدى. ەندى ول ۇلكەن ترامپليندەگى جارىسقا قاتىسادى.

بۇل سىندا باس جۇلدەنى گەرمانيالىق ۆينزەنتس گەيگەر جەڭىپ السا، ەكىنشى ورىندى نورۆەگيا شاڭعىشىسى يورگەن نيۋلاند گروباك قانجىعاسىنا بايلادى. ال ۇزدىك ۇشتىككە اۆستريالىق لۋكاش گرەيدەرەر يە بولدى.

بۇگىنگى كۇننىڭ سوڭعى جارىستارىن شورت-ترەكشىلەرىمىز اياقتادى. جاي عانا جەڭىلىسپەن اياقتاعان جوق، مەدالعا دەگەن ءۇمىتىمىزدى وياتىپ، رۋحىمىزدى سەرپىلتىپ بارىپ جارىس مارەسىن كەستى.

ناقتىراق ايتساق، شورت-ترەكتەن 1500 مەترلىك جارىستا ەل نامىسىن دەنيس نيكيشا مەن ءادىل عالياحمەتوۆ قورعادى. شيرەك فينالدا ەكەۋى ءبىر توپقا ءتۇستى. وكىنىشكە قاراي، دەنيس نيكيشا جارىس كەزىندە قۇلاپ قالىپ، ەسكەرتۋ الدى. ول وزىمەن بىرگە كانادالىق سپورتشىنى دا جارىس جولىنان ىعىستىرعان بولاتىن.

ال ءادىل عالياحمەتوۆ توپتا ەكىنشى ورىن يەلەنىپ، جارتىلاي فينالعا جولداما الدى. جارتىلاي فينالدا قىتايلىق سپورتشى ءادىلدى يتەرىپ جىبەرگەن، سول ءۇشىن ول جازالانىپ، عالياحمەتوۆ فينالعا جولداما الدى. دەگەنمەن فينالدا قازاقستاندىق سپورتشى 8-ورىن الدى.

وسىلايشا عالياحمەتوۆ جانكۇيەرلەرىن ءبىر سەرپىلتىپ، مەدالعا دەگەن ءۇمىت وتىن جاققانداي بولدى. سونداي-اق، بۇگىن شورت-ترەكتەن 1000 مەترگە جۇگىرۋدەن ايەلدەر اراسىنداعى ىرىكتەۋ جارىستارى ءوتتى. بۇل سىندا ەل نامىسىن ولگا تيحونوۆا قورعادى.

ول جارىس بارىسىندا قارسىلاسىنا سوقتىعىسىپ، قۇلاپ قالدى. وسى سەبەپتى تورەشىلەر تيحونوۆانى جارىستان شەتتەتتى. دەسە دە، ول اتالعان قاشىقتىقتى 1 مينۋت 56 سەكۋندتا جۇگىرىپ ءوتتى.

ەندى قازاقستاندىق سپورتشى 16- اقپان كۇنى 1500 مەترگە جۇگىرۋدەن سىنعا تۇسەدى. دەمەك، ءالى دە جۇلدەگەن تالاسۋعا مۇمكىندىگى بار.

اۆتور: كۇنسۇلتان وتارباي