بەيجىڭ-2022: وليمپيادانىڭ ءتورتىنشى كۇنىندە دە ەلىمىزگە مەدال بۇيىرمادى
بۇگىن، ياعني 8- اقپان كۇنى قازاقستاندىق اتلەتتەر سپورتتىڭ ءۇش ءتۇرى بويىنشا جارىس جولىنا شىقتى.
ەلدەگى تاقىمىن قىسىپ وتىرعان جانكۇيەرلەر كوگىلدىر ەكراننان كوز الماي، وليمپياداشىلارىمىزدان جۇلدە دامەتكەلى اپتاعا جاقىنداپ قالدى.
بۇگىن ءبىزدىڭ سپورتشىلار شاڭعى جارىسى، بياتلون جانە كونكيمەن جۇگىرۋدەن سىنعا ءتۇستى. وسى ءۇش سپورت تۇرىنەن توعىز سپورتشىمىز ەل نامىسىن قورعادى. توعىز سپورتشىدان بىردە-ءبىر جۇلدە بۇيىرمادى.
ايتالىق، بۇگىن ەڭ اۋەلى شاڭعىدان ايەلدەر اراسىنداعى سپرينتتەن ىرىكتەۋ جارىسى ءوتتى. وندا كسەنيا شالىگينا، انگەلينا شۋرىگا، يرينا بىكوۆا جانە نادەجدا ستەپاشكينا سىنعا ءتۇستى.
اتالعان سپورتشىلار اراسىنان ەڭ ۇزدىك ناتيجەنى نادەجدا ستەپاشكينا كورسەتتى. ول مارە سىزىعىن 51-بولىپ كەسىپ ءوتتى. ال وزگە شاڭعىشىلارىمىزدان انگەلينا شۋرىگا 60-ورىن، كسەنيا شالىگينا 67-ورىن، يرينا بىكوۆا 68-ورىنمەن ىرىكتەۋ سىنىن اياقتادى.
بۇل باسەكەدە شيرەك فينالعا شىعۋ ءۇشىن الدىڭعى 30 شاڭعىشىنىڭ قاتارىنا ءوتۋ كەرەك بولاتىن. ءبىزدىڭ ارۋلارىمىز ول مەجەگە جەتە المادى.
ودان كەيىن تۋرا وسى سىننان ەرلەر اراسىنداعى جارىس باستالدى. وندا ەل نامىسىن ەرلەردەن ەۆگەني ۆەليچكو مەن ۆيتالي پۋحكالو قورعادى. وكىنىشكە قاراي ەكەۋى دە شيرەك فينالعا شىعاتىن ۇزدىك 30 شاڭعىشىنىڭ قاتارىنا ىلىگە العان جوق.
اتاپ ايتساق، جارىس قورىتىندىسى بويىنشا ۆەليچكو 62-ورىنعا، ال پۋحكالو 66-ورىنعا ورنالاستى. وسىلايشا قازاقستاندىق سپورتشىلار سپرينتتە ىرىكتەۋدەن وتە المادى.
شاڭعىشى قىز-جىگىتتەرىمىزدەن جۇلدە بۇيىرماعان سوڭ، بياتلونشى ازاماتتارىمىزدىڭ جولىنا ۇمىتپەن قارادىق. بۇل سپورت تۇرىنەن قازاقستان نامىسىن الەكساندر مۋحين مەن ۆلاديسلاۆ كيرەيەۆ قورعادى.
اسا تارتىستى وتكەن دودادا ەكى بياتلونشىمىز دا ۇزدىكتەر قاتارىنان كورىنە العان جوق. كيرەيەۆ (+3:41.8) 25-ورىنعا يە بولسا، مۋحين (+6:13.0) 52-ورىنعا تۇراقتادى.
بۇدان ءارى نازارىمىز 1500 مەترگە كونكيمەن جۇگىرۋدەن ەرلەر اراسىنداعى سايىسقا اۋدى. بۇل سىندا ەل نامىسىن دميتري موروزوۆ قورعادى. الايدا ول جەڭىمپازدان 3.80 سەكۋندقا ۇتىلىپ، بەيجىڭ وليمپياداسىن 18-ورىنمەن اياقتادى.
مىنە، بۇگىنگى ياعني 8- اقپانداعى بەيجىڭ وليمپياداسى قازاقستاندىق سپورتشىلار ءۇشىن وسىلاي اياقتالدى.
اۆتور: كۇنسۇلتان وتارباي
