بەيجىڭ-2022: قازاقستاندىق سپورتشىلاردىڭ ارالىق ناتيجەسى قانداي

نۇر-سۇلتان. قازاقپارات - قازاقستان حالىقارالىق وليمپيادا كوميتەتىنىڭ باس حاتشىسى اندرەي كريۋكوۆ بەيجىڭ وليمپياداسىنا قاتىسىپ جاتقان قازاقستاندىق سپورتشىلاردىڭ ارالىق ناتيجەسىن باياندادى، دەپ حابارلايدى قازاقپارات.

«جاڭا عانا كونكيمەن جۇگىرۋ جارىسىنان كەلدىك، وندا ءبىزدىڭ سپورتشىلارىمىز ەكاتەرينا ايدوۆا مەن نادەجدا موروزوۆا 1500 مەتر قاشىقتىقتا سايىسقا ءتۇستى. وزدەرىڭىز بىلەتىندەي، فريستايل-موگۋل كومانداسى وسىمەن ويىندى اياقتادى. ارينە، كەشەگى ناتيجەلەردى قابىلداۋ قيىن بولدى. يۋليا گالىشيەۆا - 11-ورىن، اناستاسيا گورودكو - 21-ورىن، اياۋلىم امىرەنوۆا - 22-ورىن، ولەسيا گراۋر - 28-ورىن، دميتري رەيحارد - 8-ورىن جانە پاۆەل كولماكوۆ - 11-ورىن»، - دەدى اندرەي كريۋكوۆ Zoom ارقىلى وتكەن باسپا ءسوز ءماسليحاتىندا.

سپيكەردىڭ ايتۋىنشا، كەشە شورت-ترەك كومانداسى ارالاس ەستافەتادا 5-ورىنعا تابان تىرەدى.

«بۇل وتە جاقسى ناتيجە دەپ سانالادى. سپورتشىلارىمىزدىڭ وسىنداي ماڭىزدى ناتيجەگە قول جەتكىزگەنىنە قۋانىشتىمىز. شورت-ترەك - وتە كۇردەلى سپورت ءتۇرى. وسىنداي ناتيجە ءۇشىن سپورتشىلاردىڭ قانشا تەر توگەتىنىن بىلەمىز. سوندىقتان ءبىز وسىنداي ناتيجە ءۇشىن قۋانىشتىمىز. باسقا ويىندارعا كەلسەك، ءبارى جوسپار بويىنشا ءوتىپ جاتىر»، - دەپ تولىقتىردى اندرەي كريۋكوۆ.