ەڭ تومەنگى زەينەتاقى 2022- جىلى قانشا بولادى

نۇر- سۇلتان. قازاقپارات - «اشىق ن ق ا» پورتالىندا «2022-2024 -جىلدارعا ارنالعان رەسپۋبليكالىق بيۋدجەت تۋرالى» زاڭنىڭ جوباسى جاريالاندى، دەپ حابارلايدى قازاقپارات ءتىلشىسى.

قۇجاتتا 2022 -جىلدىڭ 1 - قاڭتارىنان باستاپ جالاقىنىڭ ەڭ تومەنگى مولشەرى 60000 تەڭگە بولاتىنى ايتىلعان. ال مەملەكەتتىك بازالىق زەينەتاقى تولەمىنىڭ ەڭ تومەنگى مولشەرى 19450 تەڭگە بولادى دەپ كورسەتىلگەن.

زاڭ جوباسى بويىنشا، 2022 -جىلدىڭ 1 - قاڭتارىنان باستاپ زەينەتاقىنىڭ ەڭ تومەنگى مولشەرى - 46302 تەڭگە بولماق. 6 - قازانعا دەيىن قوعام تالقىسىنا ۇسىنىلىپ وتىرعان قۇجات جوباسىندا وزگە دە الەۋمەتتىك تولەمدەردىڭ مولشەرى ناقتىلانعان:

- ايىپپۇل سانكسيالارىن، سالىقتار مەن باسقا دا تولەمدەرگە قولدانىلاتىن ايلىق ەسەپتىك كورسەتكىش - 3063 تەڭگە؛

- بازالىق الەۋمەتتىك تولەمدەردىڭ مولشەرىن ەسەپتەيتىن ەڭ تومەن كۇنكورىس دەڭگەيىنىڭ شاماسى - 36018 تەڭگە.

جوبانىڭ تۇسىندىرمە جازباسىندا بۇل قۇجاتتىڭ جوباسىن قابىلداۋ ارقىلى ەڭ تومەنگى جالاقى مولشەرىن قازىرگى 42500 تەڭگەدەن 60000 تەڭگەگە دەيىن ارتتىرۋ كوزدەلگەنى ايتىلعان.

اۆتور: ەسىمجان ناقتىباي