فۋتبولدان ءا چ-2022: قازاقستان قۇراماسىنىڭ قارسىلاستارى تەڭ ءتۇستى

نۇر-سۇلتان. قازاقپارات - فۋتبولدان 2022-جىلعى الەم چەمپيوناتىنا ىرىكتەۋ ساتىسىندا قازاقستان قۇراماسى سىنعا تۇسەتىن D توبىندا تاعى ءبىر كەزدەسۋ اياقتالدى، دەپ حابارلايدى قازاقپارات ءتىلشىسى.

ءوز الاڭىندا ۋكراينا قۇراماسى فينليانديامەن شەبەرلىك بايقاستى. ەكەۋى دە العاشقى تۋردا تەڭ ناتيجەگە قاناعات ءبىلدىردى.

ۋكراينالىقتار سىرت الاڭدا فرانسيامەن 1:1، فينليانديا ءوز الاڭىندا بوسنيا جانە گەرتسوگوۆينامەن 2:2 ەسەبىمەن تەڭ ءتۇستى. سوندىقتان بۇگىنگى ويىندا قوس قۇراما جەڭىسكە جەتۋ جولىن ىزدەدى.

دەسە دە ءبىرىنشى كەزەڭدە قوس قارسىلاس ءبىر-ءبىرىنىڭ قاقپاسىنان ساڭىلاۋ تابا العان جوق. ەكىنشى كەزەڭدە دە ويىن الما-كەزەك شابۋىلمەن ءوربىدى. ناتيجەسىندە 80-مينۋتتا ۋكراينا قۇراماسى ساپىنان جۋنيور موراەس ەسەپ اشسا، فينليانديالىق تەزمۋ پۋككي 89-مينۋتتا پەنالتيدەن گول سوقتى.

وسىلايشا كەزدەسۋ 1:1 ەسەبىمەن تەڭ اياقتالدى. ەكى تۋردان كەيىن فرانسيا قۇراماسى ءتورت ۇپايمەن كوش باسىندا تۇر. ودان كەيىنگى ورىندارداعى ۋكراينا مەن فينليانديانىڭ ەنشىسىندە ەكى- ەكىدەن ۇپاي بولسا، بوسنيا جانە گەرتسوگوۆينا ازىرگە ءبىر ۇپايدى مىسە تۇتقان.

ال قازاقستان ازىرگە ۇپاي ەنشىلەگەن جوق.

ەستەرىڭىزگە سالا كەتەلىك، بۇگىن اتالعان توپتا قازاقستان ءوز الاڭىندا فرانسيادان 0:2 ەسەبىمەن جەڭىلىپ قالدى. ەندى 31- ناۋرىزدا بۇل توپتا تاعى ەكى ويىن وتكىزىلەدى. ءوز الاڭىندا ۋكراينا قازاقستاندى قابىلداسا، بوسنيا جانە گەرتسوگوۆينا فرانسيامەن شەبەرلىك بايقاسادى.