قاراعاندى وبلىسىندا 2022 -جىلى ۆولفرام وندىرىلە باستايدى
پورتالدىڭ جازۋىنشا، گەولوگتار قاراعاندى وبلىسىنىڭ سولتۇستىك قاتپار كەنىشىندە ۇلكەن ۆولفرام قورىنىڭ بار ەكەندىگىن راستادى. سيرەك كەزدەسەتىن مەتالدى ءوندىرۋ جۇمىستارى 2022 -جىلى باستالۋى مۇمكىن.
«الدىن الا جۇرگىزىلگەن بۇرعىلاۋ جۇمىستارى قاراعاندى وبلىسىنىڭ سولتۇستىك قاتپار كەنىشىندە ۆولفرام مەن موليبدەننىڭ بار ەكەندىگىن راستادى. مۇندا ۆولفرامنىڭ قورى شامامەن 90 مىڭ توننانى قۇرايدى، ال موليبدەننىڭ قورى 13 مىڭ تونناعا جەتەدى»، - دەپ حابارلادى «تاۋ- كەن سامۇرىق» ۇ گ ك» ا ق باسپا ءسوز قىزمەتى.
زەرتتەۋ جۇمىستارى كەننىڭ تاريحي تارالۋ ايماعىنىڭ قازىرگى مالىمەتتەرمەن كوپ سايكەسەتىندىگىن كورسەتتى.
زەرتتەۋ جۇمىستارى وتاندىق جانە شەتەلدىك مامانداردىڭ قاتىسۋىمەن جۇرگىزىلدى. اتالعان كەنىش ءۇشىن كەندى بايىتۋ تەحنولوگياسىن بەيجىڭ تاۋ- كەن ءىسى جانە مەتالۋرگيا ينستيتۋتى دايىندادى.
قازاقستان ۆولفرام ءوندىرۋ ءىسىن جاڭعىرتپاق. ەلدە بۇگىندە 10-نان استام ۆولفرام كەنىشتەرى بارلاندى. ولاردىڭ اراسىنداعى ەڭ ءىرى ءارى بولاشاعى زور دەگەندەرى قاراعاندى وبلىسىنىڭ شەت اۋدانىنداعى جوعارعى قايراقتى جانە سولتۇستىك قاتپار كەنىشتەرى سانالادى. الدىن الا مالىمەتتەر بويىنشا، ونداعى قوردىڭ مولشەرى شامامەن 1 ميلليوننان استام توننانى قۇرايدى.
جوعارعى قايراقتى كەنىشىندە گەولوگيالىق زەرتتەۋ جۇمىستارىن 2019 -جىلى اياقتاۋ كوزدەلىپ وتىر. وسى زەرتتەۋدىڭ ناتيجەسى بويىنشا، مەتالل قورىنىڭ مولشەرى بەلگىلى بولادى.
ايدار وسپاناليەۆ
**
ۆولفرام- حيميالىق ەلەمەنت؛ اتومدىق ءنومىرى 74، اتومدىق ماسساسى 183,85. ۆولفرام تابيعاتتا از تاراعان. بوس كۇيىندە كەزدەسپەيدى، ونىڭ مينەرالدارى - ۆولفراماتتار، ازداپ وكسيدتەر جانە سۋلفيدتەر كۇيىندە كەزدەسەدى. ۆولفرامدى 1781 -جىلى شۆەد حيميگى كارل شەەلە تاپقان، 1783 -جىلى اعايىندى د'ەلۋيار ۆولفرام انگيدريدىن كومىرتەكپەن توتىقسىزداندىرۋ ارقىلى العاش رەت مەتالل ۆولفرام العان.
ۆولفرام اشىق سۇر ءتۇستى، باياۋ بالقيتىن مەتالل. ۆولفرام ەلەكتر شامىنىڭ قىلى، ەلەكتر پەشتەرىندە قىزدىرعىشتار، رەنتگەن تۇتىكتەردە، كاتودتار، تاعىدا باسقا ەلەكترلىك قۇرالداردا ەلەكترودتار رەتىندە قولدانىلادى.
