قازاقستاندا 2022- جىلعا قاراي فۋتبول وينايتىن بالالاردىڭ سانى ەكى ەسەگە ارتادى
بۇگىن قازاقستان فۋتبول فەدەراتسياسىنىڭ 12 - كونفەرەنتسياسى بارىسىندا فەدەراتسيا باسشىسى ەرلان قوجاعاپانوۆ «فۋتبولدى دامىتۋدىڭ 2016-2022 - جىلدارعا ارنالعان باعدارلاماسى» جوباسىن ۇسىندى.
بۇل تۋرالى فەدەراتسياسىنىڭ باسپا ءسوز قىزمەتىنەن حابارلادى.
باعدارلاما جوباسىندا بالالار مەن جاسوسپىرىمدەر فۋتبولىن دامىتۋعا ەرەكشە نازار اۋدارىلىپ وتىر.
«نەگىگزى مىندەت رەتىندە ءبىز فۋتبول وينايتىن بالالاردىڭ، سونداي- اق بالالاردى جاتتىقتىرۋشىلار سانىن ارتىرۋدى قويىپ وتىرمىز. بۇعان سايكەس، 2022 - جىلعا قاراي ەلىمىزدە فۋتبولمەن اينالىساتىن بالالار سانىن ەكى ەسەگە، اتاپ ايتقاندا، بۇگىنگى 386 مىڭنان 750 مىڭعا جەتكىزۋدى ماقسات ەتەمىز»، - دەدى ە. قوجاعاپانوۆ.
بۇل رەتتە فەدەراتسيا باسشىسى ەلىمىزدەگى كليماتتىق ەركشەلىكتەردى ەسكەرە وتىرىپ، جابىق فۋتبول الاڭدارىنىڭ سانىن دا كوبەيتۋ قاجەتتىگىن العا تارتادى. سونىمەن قاتار فۋتبول كلۋبتارىنىڭ ينفراقۇرىلىمىن جاقسارتۋعا دا نازار اۋدارىلىپ وتىر.
«تاعى ءبىر ماڭىزدى ماسەلە - فۋتبولدى كوممەرتسيالاندىرۋ. بۇل مىندەتتى شەشۋ اياسىندا ءبىز ويىن ستاديوندارىنا تالاپتى قاتاڭداتامىز. سپورتتىق ينفراقۇرىلىمدى جاقسارتۋ ءۇشىن فەدەراتسيا مەملەكەتتىك- جەكە مەنشىك ارىپتەستىك قاعيداتىنا جۇگىنەدى، شەتەلدىك ينۆەستورلار تارتۋدى دا قولدايتىن بولامىز»، - دەدى ول.
«ءبىز تەڭگەرىمدى ترانسفەرلى ساياساتتى قولدايمىز. سوندىقتان جاقىن كەلەشەكتە ءتيىستى وزگەرىستەردى رەگلامەنتكە ەنگىزبەكپىز. لەگيونەرلەرگە (شەتەلدىك جالدامالىلار) قاتىستى ماسەلەنى ءبىرىنشى ليگادان باستاۋدى ۇسىنامىز، سول سەبەپتى كەلەسى جىلدان باستاپ بىزدە تەك وتاندىق فۋتبول كلۋبتارىنىڭ تۇلەكتەرى وينايتىن بولادى. ءدال وسىعان ۇقساس شارالار جاتتىقتىرۋشىلار مەن باپكەرلەر كورپۋسىنا دا قاتىستى قابىلدانباق» ، - دەدى ە. قوجاعاپانوۆ.
اۆتور: قانات مامەتقازى ۇلى
