استانانىڭ 2022 -جىلعى بيۋدجەتى 889 ميلليارد تەڭگە بولىپ ناقتىلاندى
بۇل تۋرالى قالالىق ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ مىندەتىن اتقارۋشى ايجان ءالىم قىزى مالىمدەدى، دەپ حابارلايدى قازاقپارات ءتىلشىسى.
ونىڭ ايتۋىنشا، ناقتى جينالۋ تالداۋلارىنا سۇيەنىپ، جەكە تابىس جوسپارىن 556,7 ميلليارد تەڭگەگە دەيىن 3,1 ميلليارد تەڭگەگە ۇلعايتۋ ۇسىنىلادى. ال سالىق تۇسىمدەرى بويىنشا - 503 ميلليارد تەڭگەگە دەيىن، سالىقتىق ەمەس تۇسىمدەردى - 643 ميلليارد تەڭگەگە دەيىن، ايىپپۇلدار مەن وزگە دە تۇسىمدەر جوسپارىن - 13,8 ميلليارد تەڭگەگە دەيىن ارتتىرۋ كوزدەلەدى.
وعان قوسا، باسقارما وكىلى بيۋدجەتتىڭ نەگىزگى شىعىندارى تۋرالى باياندالدى.
«وتىن- ەنەرگەتيكالىق كەشەن مەن كوممۋنالدىق شارۋاشىلىق باسقارماسىنا قوسىمشا 2 ميلليارد 481,8 ميلليون تەڭگە قاراستىرىلعان. قورشاعان ورتانى قورعاۋ جانە تابيعاتتى پايدالانۋ باسقارماسىنا استانا قالاسىنىڭ جاسىل بەلدەۋىندە كوشەتتەردى قايتا جاڭارتۋ مەن داقىل ەگۋ شارالارىنا 133,3 ميلليون تەڭگە قاراستىرىلعان. قالالىق ورتا ساپاسى جانە باقىلاۋ باسقارماسىنا قالالىق مونيتورينگ جانە جەدەل ارەكەت ەتۋ ورتالىعىنىڭ قىزمەتكەرلەرىنە ەڭبەكاقى تولەۋ قورىنىڭ ۇلعايۋىنا بايلانىستى 98,6 ميلليون تەڭگە بولىنەدى»، - دەدى ايجان ءالىم قىزى استانا قالالىق ءماسليحاتىنىڭ كەزەكتەن تىس سەسسياسىندا.
«الماتى جانە ەسىل اۋداندارى اكىمىنىڭ اپپاراتىنا ەلدىمەكەندەردى اباتتاندىرۋ جانە كوگالداندىرۋ باعدارلاماسى بويىنشا تيىسىنشە 218 ميلليون جانە 235,8 ميلليون تەڭگە قاراستىرىلعان. استانا قالاسى اكىمىنىڭ اپپاراتىنا «اۋماقتىق قورعانىستى دايىنداۋ» باعدارلاماسى بويىنشا 98,6 ميلليون تەڭگە قاراجات ازايتىلدى. قوعامدىق دەنساۋلىق ساقتاۋ باسقارماسىنا 363 ميلليون تەڭگە قايتا ءبولدى»، - دەدى ول.
وسىلايشا، ەنگىزىلگەن وزگەرىستەرگە سايكەس، استانا قالاسىنىڭ 2022 -جىلعا ارنالعان ناقتىلانعان بيۋدجەتى 889 ميلليارد 41 ميلليون تەڭگە بولدى. ونىڭ ىشىندە، جەكە تابىس بويىنشا تۇسىمدەر 556 ميلليارد 669 ميلليون تەڭگەنى قۇرايدى. رەسپۋبليكالىق بيۋدجەتتەن بەرىلەتىن ترانسفەرتتەر - 236 ميلليارد 927 ميلليون تەڭگە.
اۆتور
ايجان سەرىكجان قىزى
