بەيجىڭ-2022: ءبىر كۇندە 55 ادام كوروناۆيرۋس جۇقتىردى

نۇر-سۇلتان. قازاقپارات - بۇگىن بەيجىڭدەگى وليمپيادا قالاشىعىندا ءبىر كۇندە 55 ادام كوۆيد جۇقتىرعانى بەلگىلى بولدى، دەپ حابارلايدى قازاقپارات.

ۇيىمداستىرۋ كوميتەتى بۇل - دەلەگاتسيالار كەلگەلى ءبىر كۇندە تىركەلگەن ەڭ جوعارى كورسەتكىش ەكەنىن ايتىپ دابىل قاقتى. بۇگىنگە دەيىن وليمپيادا ويىندارىنا كەلگەن 300 گە جۋىق ادامنان كورونوۆيرۋس بەلگىلەرى بايقالعان.

قازىرگى تاڭدا ونىڭ بارلىعى ۇيىمداستىرۋ كوميتەتىنىڭ تالاپتارىنا ساي كارانتينگە جاتقىزىلىپ، تەكسەرىلۋدە. ولاردىڭ قاتارىندا سپورتشىلار دا بار. وليمپيادا ويىندارىن ۇيىمداستىرۋ كوميتەتىنىڭ باستى تالابى - بەيجىڭگە كەلگەنگە دەيىن ۆاكسينا العان بولۋى شارت. سونىمەن قاتار ولار قىتايعا بارعانعا دەيىن ءبىر جانە كەلگەن سوڭ 2 رەت پ ت ر تەست تاپسىرۋعا مىندەتتى.

وليمپيادا ويىندارىندا سپورتشىلارعا ءتارتىپ قاتال. ءار دەلەگاتسيا مۇشەلەرى كۇن سايىن سىناقتان ءوتىپ وتىرۋى ءتيىس. تەست ناتيجەسى وڭ ناتيجە بەرگەن جاعدايدا وليمپياداعا قاتىسۋ قۇقىعىنان ايىرىلادى.

قازاقستاندىق سپورتشىلار بۇگىن فريستايل-موگۋلدان العاشقى ىرىكتەۋ جارىسىن وتكىزدى. ازىرگە جەرلەستەرىمىزدەن كوۆيد تابىلعان جوق.

ايتا كەتەيىك، اق وليمپيادانىڭ رەسمي اشىلۋ ءراسىمى ەرتەڭ نۇر-سۇلتان ۋاقىتىمەن 17:55 تە باستالادى. سالتاناتتى شارانى «حابار»، «Qazaqstan»، «Qazsport» جانە «elarna» تەلەارنالارى تىكەلەي ەفيردەن كورسەتەدى.

اۆتور: كۇنسۇلتان وتارباي