فۋتبولدان 2022-جىلعى الەم چەمپيوناتىنىڭ جەرەبەسى 1- ساۋىردە تارتىلادى

None
None
نۇر-سۇلتان. قازاقپارات - فۋتبولدان 2022-جىلعى الەم چەمپيوناتىنىڭ فينالدىق ساتىسىنىڭ جەرەبەسى 1- ساۋىردە تارتىلادى، دەپ حابارلايدى قازاقپارات ءتىلشىسى.

ءدۇبىرلى دودا بيىلعى جىلدىڭ 21- قاراشاسى مەن 8- جەلتوقسانى ارالىعىندا كاتاردا وتەدى.

ەسكە سالساق، قازىرگە دەيىن وعان 20 قۇراما جولداما الىپ ۇلگەرگەن. ولاردىڭ قاتارىندا الاڭ يەسى - كاتار، ەۋروپا ەلدەرىنەن - گەرمانيا، دانيا، فرانسيا، بەلگيا، حورۆاتيا، يسپانيا، سەربيا، انگليا، شۆەيتساريا، نيدەرلاندى، وڭتۇستىك امەريكادان - برازيليا، ارگەنتينا، ۋرۋگۆاي، ەكۆادور، سولتۇستىك امەريكادان - كانادا، ازيا مەملەكەتتەرىنەن - يران، وڭتۇستىك كورەيا، جاپونيا، ساۋد ارابياسى قۇرامالارى شىققان بولاتىن.

الەم چەمپيوناتىنىڭ فينالدىق ساتىسىنىڭ جەرەبەسى 1-ساۋىردە كاتار استاناسى - دوحا قالاسىندا وتەدى.

بۇل ۋاقىتتا 32 قۇرامانىڭ 29 ى انىقتالادى. ودان كەيىنگى ۋاقىتتا وڭتۇستىك امەريكا، ازيا، سولتۇستىك امەريكا جانە مۇحيت ايماعىنان ءتورت قۇراما قۇرلىقارالىق وتپەلى سايىستا تاعى ەكى جولداماعا تالاسادى.

ال ەۋروپا قۇرلىعىندا الەم چەمپيناتى وتپەلى سايىسىندا ءبىر ويىنمەن شوتلانديا مەن ۋكراينا جەڭىمپازى انىقتالادى.

بۇل ويىن شامامەن ماۋسىم ايىنا بەلگىلەنگەن. جەڭىمپازى سول ايدا ۋەلسپەن تاعى ءبىر جولدامانى ساراپقا سالادى.

سالتاناتتى شارا ەلوردا ۋاقىتىمەن 22.00 دە باستالىپ، «Qazsport» تەلەارناسىنان تىكەلەي ەفيردە كورسەتىلەدى.

ەسكە سالساق، كانادا فۋتبولشىلارى 36 جىلدان كەيىن الەم چەمپيوناتىنىڭ فينالىنا شىقتى.

سوڭعى جاڭالىقتار