قىسقى پاراليمپيادا-2022: قازاقستان مەدالدار كەستەسىندە 18-ورىنعا جايعاستى

نۇر-سۇلتان. قازاقپارات - 2022-جىلعى XIII قىسقى پاراليمپيادا ويىندارىندا قازاقستان مەدالدار كەستەسىندە 18-ورىنعا جايعاستى، دەپ حابارلايدى قازاقپارات ءتىلشىسى.

ەسكە سالساق، كەشە قازاقستاندىق سپورتشى الەكساندر گەرليتس پارابياتلوننان 10 شاقىرىمعا تۇرەگەپ سىرعاناۋدا مارە سىزىعىن ءۇشىنشى بولىپ قيدى.

وسىلايشا ەلىمىزدىڭ اتىنان بيىلعى باسەكەدە العاشقى جۇلدەگە قول جەتكىزدى. باسەكەدە التىن مەدال كانادالىق مارك ارەندزگە بۇيىرسا، كۇمىس جۇلدەنى ۋكراينالىق گريگوري ۆوۆچينسكي الدى.

قازىرگە دەيىن مەدالدار كەستەسىندە بارلىعى 19 مەملەكەت ورنالاسقان.

ولاردىڭ قاتارىندا قازاقستان 18-ورىن ەنشىلەدى. مەدالدار كەستەسىندە قىتاي 26 مەدالمەن (8 التىن، 8 كۇمىس، 10 قولا) كوش باسىندا تۇر.

ودان كەيىن ۋكراينا 13 (5 التىن، 5 كۇمىس، 3 قولا)، كانادا 13 (5 التىن، 2 كۇمىس، 6 قولا) مەدالمەن ۇزدىك ۇشتىكتە كەلەدى.

جالپى العاندا جۇلدەگە قول ىلىككەندەر قاتارىندا جاپونيا، فرانسيا، سلوۆاكيا، ا ق ش، نورۆەگيا، گەرمانيا، اۆستريا، ۇلى بريتانيا، جاڭا زەلانديا، يتاليا، فينليانديا، شۆەتسيا، نيدەرلاندى، اۆستراليا جانە شۆەيتساريا بار.

قىسقى پاراليمپيادا 4-جانە 13- ناۋرىز ارالىعىندا وتكىزىلەدى.

وندا الەمنىڭ 50 مەملەكەتىنەن كەلگەن 700 گە تارتا سپورتشى باق سىناۋدا.

ەسكە سالساق، XIII قىسقى پاراليمپيادا ويىندارىندا قازاقستان اتىنان سەرگەي ۋسولتسيەۆ، الەكساندر گەرليتس، ەربول حاميتوۆ، دەنيس پەترەنكو مەن يۋريي بەرەزين ەل نامىسىن قورعايدى.

ەندى قازاقستاندىق سپورتشىلار 11، 12، 13- ناۋرىز كۇندەرى ايتۋلى الاماندا باق سىنايدى.