قازاقستاندا 2021-جىلى اۆتوموبيل ءوندىرىسى قانشا پايىزعا ءوستى؟

بۇل تۋرالى ق ر پرەمەر-ءمينيسترى ءاليحان سمايىلوۆتىڭ قازاقستان ماشينا جاساۋشىلار وداعى باسقارماسىنىڭ ءتوراعاسى مەيرام پىشەمبايەۆپەن كەزدەسۋىنەن ءمالىم بولدى، دەپ حابارلايدى قازاقپارات.
ۇكىمەتتىڭ رەسمي سايتىنىڭ حابارلاۋىنشا، كەزدەسۋ بارىسىندا ماشينا جاساۋشىلار وداعىنىڭ باسشىسى وسى سالانىڭ جاي-كۇيى، سىرتقى فاكتورلاردىڭ اسەرى جاعدايىندا الدا تۇرعان مىندەتتەر مەن دامۋ پەرسپەكتيۆالارى تۋرالى باياندادى.
2021-جىلدىڭ قورىتىندىسى بويىنشا تەمىر جول ماشيناسىن جاساۋ 300 پايىزعا، اۋىل شارۋاشىلىعى ماشيناسىن جاساۋ 50,4 پايىزعا، تاۋ-كەن مەتاللۋرگياسى ماشيناسىن جاساۋ 29,3 پايىزعا، اۆتوموبيل ءوندىرىسى 24 پايىزعا، ەلەكتروتەحنيكالىق ماشينا جاساۋ 16,7 پايىزعا جانە مۇناي-گاز ماشيناسىن جاساۋ 14,2 پايىزعا ەلەۋلى ءوسىم كورسەتتى.
كەزدەسۋ بارىسىندا ماشينا جاساۋ سالاسىن دامىتۋدىڭ 2024-جىلعا دەيىنگى جول كارتاسىن ىسكە اسىرۋ، سالا كاسىپورىندارىن وتاندىق شيكىزاتپەن قامتاماسىز ەتۋ، جاڭا وندىرىستەردى قۇرۋ جانە جۇمىس ىستەپ تۇرعاندارىن جاڭعىرتۋ ءۇشىن قولجەتىمدى قاراجات ءبولۋ، وتاندىق تاۋار وندىرۋشىلەرمەن وففتەيك-كەلىسىمشارتتار جاساسۋ، سونداي-اق ماشينا جاساۋ سالاسىنداعى ءوندىرىس كولەمىن ارتتىرۋ ماسەلەلەرى تالقىلاندى.
م. پىشەمبايەۆتىڭ ايتۋىنشا، 2021-جىلى يمپورتتىڭ جالپى كولەمى $41 ميلليارد قۇرادى، ونىڭ ىشىندە $17 ميلليارد نەمەسە 41 پايىزى وتاندىق ماشينا جاساۋ ونىمدەرىنە تيەسىلى.
وسىعان بايلانىستى يمپورتتى وتاندىق وندىرىسپەن الماستىرۋ ماسەلەسى - اتالعان نارىقتى دامىتىپ، ەكسپورتقا شىعۋ ءۇشىن وتە وزەكتى.
كەزدەسۋ قورىتىندىسى بويىنشا ءاليحان سمايىلوۆ ۇكىمەت سالانى ىنتالاندىرۋ جانە قازاقستاندا ماشينا جاساۋدى دامىتۋ ءۇشىن قولايلى جاعدايلار جاساۋ جۇمىسىن ودان ءارى جالعاستىراتىنىن اتاپ ءوتتى.