08:02, 09 - قىركۇيەك 2021 | GMT +5
فۋتبول: جاپونيا 2021 -جىلعى كلۋبتار اراسىنداعى الەم چەمپيوناتىن وتكىزۋدەن باس تارتتى
توكيو. Kyodo News-قازاقپارات - جاپون فۋتبول قاۋىمداستىعى (JFA) ەلدە كوروناۆيرۋستىڭ تارالۋىنان تۋىنداعان شەكتەۋلەرگە بايلانىستى 2021 -جىلعى كلۋبتار اراسىنداعى الەم چەمپيوناتىنان باس تارتۋ تۋرالى شەشىم قابىلدادى، دەپ حابارلايدى قازاقپارات Kyodo News اگەنتتىگىنە سىلتەمە جاساپ.
جاپونيا ۇيىمداستىراتىن كلۋبتار اراسىنداعى الەم چەمپيوناتى 9-19-جەلتوقسان ارالىعىندا ءوتۋى ءتيىس ەدى. JFA ءوزىنىڭ 100 -جىلدىق مەرەيتويى اياسىندا تۋرنير ۇيىمداستىرماق بولعان. ءبىراق ولاردىڭ بۇل شەشىمىن وزگەرتۋگە ەلدەگى COVID-19 جۇقتىرعاندار سانىنىڭ كوبەيۋى جانە كورەرمەندەردىڭ ستەندكە كىرۋىنىڭ بەلگىسىزدىگى اسەر ەتتى.
ولار حالىقارالىق فۋتبول فەدەراتسياسىنا (FIFA) باس تارتقانى تۋرالى حابارلادى، ءقازىر تاراپتار بۇل ماسەلەنى تالقىلاپ جاتىر. ويتكەنى FIFA - دا ءتۋرنيردى اۋىستىرۋدىڭ رەزەرۆتىك نۇسقالارى جوق. ايتا كەتەر بولساق، جاپونيا كلۋبتار اراسىنداعى الەم چەمپيوناتىن سەگىز رەت قابىلدادى، تۋرنير سوڭعى رەت بۇل ەلدە 2016 -جىلى ءوتتى.
