پرەزيدەنت جولداۋى-2021: حالىقتىڭ پىكىرى قانداي؟

نۇر-سۇلتان. قازاقپارات - بۇگىن مەملەكەت باسشىسى قاسىم-جومارت توقايەۆ قازاقستان حالقىنا جولداۋىن جاريالادى.

جولداۋدا وسىعان دەيىن جۇزەگە اسقان دۇنيەلەر ايتىلىپ، العا جاڭا ماقسات-مىندەتتەر قويىلدى.

وسى ورايدا قازاقپارات ءتىلشىسى پرەزيدەنتتىڭ جاڭا جولداۋىنا قاتىستى استانالىقتاردىڭ وي-پىكىرىن تىڭداپ كوردى.

زينايدا يۆانوۆنا، زەينەتكەر

- پرەزيدەنت ايتقان جانە قابىلداعان شارالار شەتىنەن جۇزەگە اسىپ جاتىر. سونىمەن بىرگە العا قويىلعان مىندەتتەر سوڭىنا دەيىن ىسكە اسۋى ءتيىس. سولاردىڭ قاتارىندا 1 مىڭ مەكتەپ سالۋ كەرەك دەگەن تاپسىرماسى كوڭىلدەن شىقتى. ويتكەنى، ءبارىمىزدىڭ دە بالامىز بار. وزىمە قاتىستى ايتار بولسام، زەينەتاقىنى كوتەرسە، جاقسى بولار ەدى.

ازىق-تۇلىك باعاسىن شۋلاپ ءجۇرىپ رەتكە كەلتىرگەن سەكىلدىمىز، بۇگىندە تۇراقتاعانى بايقالادى. ايتپاقشى، ۇمىتىپ بارامىن، توقايەۆ ايتقان تاپسىرمالاردىڭ ىشىندە زەينەتاقى جيناعىن تۇرعىن ءۇي الۋعا جۇمساۋ - وڭدى شەشىم. ەندى ونىڭ شەكتى مولشەرىن وزگەرتسە، بۇل قاراپايىم حالىق ءۇشىن ماڭىزدى.

تولقىن ساعىنبايەۆا، ەلوردا تۇرعىنى

- ءيا، جالاقى وسەدى دەگەندى ەستىدىم. قۋانتادى. اسىرەسە، ءورت ءسوندىرۋشى سەكىلدى جۇمىسى اۋىر ماماندىق يەلەرىنىڭ ەڭبەگى ەلەنسە دەگەن ءوتىنىش بار. جالاقى وسۋمەن قاتار باعا تۇراقتالسا يگى. ايتپەسە جالاقى وسەدى، ىزىنشە ازىق-تۇلىك، باسقا دا زاتتاردىڭ باعاسى كوتەرىلىپ كەتەدى.

پرەزيدەنت ايتىپ، ناقتى جۇزەگە اسىپ جاتقان ءىستىڭ ءبىرى - مەملەكەتتىك قىزمەتتەردى سيفرلاندىرۋ. ونىڭ اسەرى بايقالىپ جاتىر. بۇگىندە ءبىراز قىزمەتتى ۇيدە وتىرىپ-اق الىپ وتىرمىز. سوندىقتان بار دۇنيەنى ايتقان دۇرىس. بۇرىنعىداي ح ق و- عا بارىپ جۇگىرە بەرمەيتىنىمىز راس. وتە ىڭعايلى.

اسىلزات قانات قىزى، قالا تۇرعىنى

- حالىقتى ءجيى مازالايتىن سۇراق - ءبىز كوپ تۇتىناتىن زاتتاردىڭ باعاسى. بيلىك باعانىڭ وسپەۋىن قاداعالاۋى ءتيىس. ونى پرەزيدەنتتىڭ ءوزى دە ءجيى ايتادى. باسقا سالا بويىنشا مەنى ەل ازاماتى رەتىندە مازالايتىن سۇراق جوق. جۇمىس بار، جالاقى ۋاقىتىلى بەرىلىپ تۇر. ءوزىم كوپبالالى انامىن، بالالارعا بەرىلەتىن جاردەماقىنى راسىمدەۋ مەن الۋ جولى جەڭىلدەيدى دەگەندى ەستىپ قالدىم. جاقسى بولار ەدى.

جاڭا جولداۋدا ءبىراز دۇنيە ايتىلدى راس، ەندى سونىڭ ورىندالۋىن كۇتەمىز. ءوز ويىم، مەملەكەت باسشىسى ايتقان دۇنيەلەر سول قالپىندا ورىندالۋى ءتيىس.

مەرۋەرت ايتبايەۆا، ەلوردا تۇرعىنى

- مەملەكەت سوڭعى ۋاقىتتا الەۋمەتتىك ماسەلەلەرگە ءجيى كوڭىل اۋدارىپ جاتىر. ونىڭ ىشىندە زەينەتاقى، جالاقى مەن ءتۇرلى جاردەماقى دا بار. پرەزيدەنت كوتەرگەن تاعى ءبىر ماڭىزدى ماسەلە - زەينەتاقى جيناعىنىڭ ءبىر بولىگىن باسپانا الۋعا جۇمساي الۋ مۇمكىندىگى. وتە جاقسى باستاما، ونىڭ ۇستىنە ۇلكەن قالالاردا تۇرعىن ءۇي ماسەلەسى وتكىر.

وسى ورايدا ءۇيدىڭ باعاسى وسپەسە ەكەن دەگەن تىلەك بار. ويتكەنى زەينەتاقى جيناعى اركىمدە ءارقالاي، بارىنىكى بىردەي پاتەر الۋعا جەتە بەرمەيدى. قاراپايىم حالىقتى تولعاندىراتىن باستى ماسەلە - ازىق-تۇلىك باعاسى. ءيا، بيلىكتىڭ باعانى وسىرمەۋ جولىندا جۇمىس ىستەپ جاتقانىن بىلەمىز، دەگەنمەن كەي جاعدايدا ماسەلە پرەزيدەنت ارالاسقاننان سوڭ عانا شەشىلىپ جاتادى.

جاندوس ەلبازاروۆ، قالا تۇرعىنى

- بۇگىن پرەزيدەنتتىڭ جولداۋىن تەلەديدار ارقىلى تىڭدادىم. سودان ۇققانىم، ەڭ تومەنگى جالاقى 60 مىڭ تەڭگەگە دەيىن كوتەرىلەتىنى. بۇل اسىرەسە از قامتىلعان جانە الەۋمەتتىك وسال وتباسىلار ءۇشىن ەداۋىر قولداۋ. سول سياقتى مەملەكەت باسشىسى 2024-جىلى اۋدان اكىمدەرىنىڭ سايلاۋى وتەتىنىن ايتتى.

بۇل دا ءبىر جاڭاشىلدىق، بيىل اۋىل اكىمدەرىن سايلادىق. ودان بولەك، 800 مەكتەپتىڭ ورنىنا 1 مىڭ مەكتەپ سالۋ كەرەكتىگى ايتىلدى. قوعام ءۇشىن تاعى ءبىر ماڭىزدى ماسەلە - ءتىل. حالىق تۇتاستىعىن ويلاساق، مەنىڭ، سەنىڭ ءتىلىڭ دەپ تارازىعا سالماعانىمىز ابزال. ءوز باسىم پرەزيدەنت جولداۋىن جىل سايىن جىبەرمەي قارايمىن.