قازاقستاندا 2021 -جىلعا قاراي ءومىر ءسۇرۋ ۇزاقتىعى 73 جاستان اسادى
بۇگىن «نۇر وتان» پارتياسىنىڭ كەزەكتەن تىس XVII سەزىندە قابىلدانعان پارتيانىڭ «قازاقستان-2021: بىرلىك. تۇراقتىلىق. جاسامپازدىق» اتتى سايلاۋالدى باعدارلاماسىندا وسى ماسەلە قامتىلىپ وتىر.
سايلاۋالدى باعدارلامانىڭ باستى بولىمدەرىنىڭ ءبىرى جاڭا ءومىر ساپاسىنا، سونىڭ ىشىندە دەنساۋلىق ساقتاۋ مەن ءبىلىم بەرۋدى ۇزدىك الەمدىك ستاندارتتارعا جەتكىزۋگە مەجەلەنىپ وتىر.
«ەڭ دامىعان مەملەكەتتەردىڭ وتىزدىعىنا قاراي تابىستى ىلگەرىلەۋ جاڭا ءومىر ساپاسىنا كوشۋدى كوزدەيدى. سوندىقتان دا، «نۇر وتان» پارتياسى ءۇشىن قامقورلىق جاسالاتىن ايرىقشا سالا - دەنساۋلىق ساقتاۋ مەن ءبىلىم بەرۋ. مۇندا ءبىز ەكونوميكالىق دامۋ جانە ىنتىماقتاستىق ۇيىمى ەلدەرىنىڭ ستاندارتتارىنا باعدار ۇستانامىز»، - دەلىنگەن پارتيالىق قۇجاتتا.
بۇدان بولەك، پارتيانىڭ بەسجىلدىق باعدارلاماسىندا باستاپقى دەنساۋلىق ساقتاۋدى دامىتۋعا باسىمدىق بەرىلەتىنى قاراستىرىلىپ وتىر. بۇل پاتسيەنتتەردىڭ شىنايى مۇقتاجدىقتارى توڭىرەگىندە تۇزىلگەن دەنساۋلىق ساقتاۋدىڭ ينتەگراتسيالانعان جۇيەسىنىڭ نەگىزى بولماق.
«وتباسىلىق دارىگەرلەر مەديتسينانىڭ ورتالىق جانە ۇيلەستىرۋشى بۋىنى بولۋى كەرەك. ول حالىقتىڭ دا، مەملەكەتتىڭ دە مۇددەسىنە ساي كەلەدى. ناتيجەسىندە 2021 -جىلعا قاراي كۇتىلەتىن ءومىر ءسۇرۋ ۇزاقتىعى 73 جاستان اسادى، ءولىم دەڭگەيى، ءولىم-ءجىتىم دەڭگەيى 10 پايىزدان استامعا ازايىپ، مىڭ ادامعا شاققاندا 7,6 دان 6,28 گە دەيىن تومەندەيدى»، - دەلىنگەن بەس جىلعا ارنالعان باعدارلامادا.
اۆتور: قانات مامەتقازى ۇلى
