قازاقستاندا 2020-جىلى بالا تۋۋ سانى ارتتى
بۇل تۋرالى انا ءولىمىن ازايتۋ بويىنشا شۇعىل شارالار قابىلداۋ جونىندەگى رەسپۋبليكالىق شتابتىڭ كوشپەلى وتىرىسىندا ايتىلدى، دەپ حابارلايدى قازاقپارات دەنساۋلىق ساقتاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
رەسپۋبليكالىق شتابتىڭ كوشپەلى وتىرىسىن اقتوبە وبلىسىنا ساپارمەن بارعان دەنساۋلىق ساقتاۋ ۆيتسە-ءمينيسترى اجار عينيات وتكىزدى. كەڭەسكە 17 ءوڭىر اكىمىنىڭ ورىنباسارى، دەنساۋلىق ساقتاۋ باسقارمالارىنىڭ باسشىلارى جانە ولاردىڭ بوساندىرۋ ءىسى بويىنشا ورىنباسارلارى، ا گ پ ع و جانە ا ب ۇ و، مەديتسينالىق ج و و كافەدراسىنىڭ مەڭگەرۋشىلەرى، مەديتسينالىق ۇيىمداردىڭ باسشىلارى قاتىستى.
2020-جىلى بوسانعاندار سانى وتكەن جىلدىڭ سايكەس كەزەڭىمەن سالىستىرعاندا 22298 گە ارتىپ، 24739 بالا تۋدى، جۇكتى ايەلدەر سانى وتكەن جىلدىڭ سايكەس كەزەڭىمەن سالىستىرعاندا 21147 گە كوپ. ا. عينيات اتاپ وتكەندەي، مەملەكەت باسشىسى ەل الدىنا انالارعا ساپالى مەديتسينالىق كومەك كورسەتۋ بويىنشا جاڭا مىندەتتەر جۇكتەدى. پرەزيدەنت پەرزەنتحانالاردا جاعدايى اۋىر ناۋقاستاردى ەمدەۋگە ارنالعان جابدىقتار مەن شىعىن ماتەريالدارى جەتكىلىكسىز بولعاندىقتان، انا ءولىمىنىڭ دەڭگەيى جوعارى ەكەنىن ايتقان ەدى.
«مەملەكەت باسشىسى ۇكىمەتكە ءوڭىر اكىمدەرىمەن بىرلەسىپ، بارلىق دەنساۋلىق ساقتاۋ ۇيىمدارىن قايتا قاراۋدى تاپسىردى. سونىمەن قاتار، بوساندىرۋ جانە رەانيماتسيا قىزمەتتەرىنە نازار اۋدارۋ، ولاردى مەديتسينالىق جابدىقتارمەن، ءدارى-دارمەكپەن جانە بۇيىمدارمەن جابدىقتاۋ بويىنشا شارالار قابىلداۋدى بۇيىردى»، - دەدى ۆيتسە-مينيستر.
قازاقستان رەسپۋبليكاسىنىڭ الدىندا قىزمەت كورسەتۋ ساپاسىن جاقسارتۋ جانە انا دەنساۋلىعىن قورعاۋ سالاسىندا ۇلكەن جانە كۇردەلى مىندەتتەر تۇر. الەمنىڭ بارلىق ەلىندە، سونىڭ ىشىندە قازاقستاندا، COVID-19 پاندەمياسى سالدارىنان دەنساۋلىق ساقتاۋ جۇيەسىنىڭ جۇمىسى اۋىرلادى، ءبىرىنشى كەزەكتە ايەلدەرگە كورسەتىلەتىن مەديتسينالىق كومەك زارداپ شەكتى، سالدارىنان ەلىمىزدە انالار اراسىنداعى اۋرۋ مەن ءولىم-ءجىتىم ءوستى.
«بىلتىر جازدا انا ءولىمى كۇرت ءوستى جانە بۇل COVID-19 كوروناۆيرۋس ينفەكتسياسى اۋرۋىنىڭ اسقىنۋىمەن بايلانىستى، وسى كەزەڭدە انا ءولىمى جالپى قايعىلى جاعدايدىڭ %66 قۇرادى»، - دەدى ا. عينيات.
رەسپۋبليكالىق شتاب وتىرىسى بارىسىندا مينيسترلىكتىڭ انا مەن بالا دەنساۋلىعىن قورعاۋ دەپارتامەنتى انالار دەنساۋلىعىن قورعاۋ باسقارماسىنىڭ باسشىسى ءشاھيزات حالىقوۆا، مەديتسينا عىلىمدارىنىڭ دوكتورى، پروفەسسور، «ايەلدەر دەنساۋلىعى» دەپارتامەنتىنىڭ ديرەكتورى گاۋري باپايەۆا جانە «اكۋشەريا، گينەكولوگيا جانە پەريناتولوگيا عىلىمي ورتالىعى» ا ق باسقارما ءتورايىمى دينارا مىرزاحمەتوۆا بايانداما جاسادى.
كەڭەستە جاعدايى اۋىر جۇكتى ايەلدەردىڭ پروبلەماسى جانە ءولىم-ءجىتىم، شەشۋ جولدارى قارالدى. وڭىرلەرگە جۇكتى، بوساناتىن جانە بوسانعان ايەلدەرگە مەديتسينالىق كومەك كورسەتۋ ساپاسىن جاقسارتۋ بويىنشا ۇسىنىستار ايتىلدى. ا. عينيات اكىمدەردىڭ ورىنباسارلارىنا مەديتسينالىق ۇيىمدارداعى ماتەريالدىق-تەحنيكانى جاقسارتۋ، ولاردى زاماناۋي مەديتسينالىق جابدىقتارمەن، كادرمەن قامتاماسىز ەتۋ، مەديتسينالىق كومەك كورسەتۋدى ۇيىمداستىرۋ دەڭگەيىن ارتتىرۋدى تاپسىردى.
ەسكە سالا كەتسەك، دەنساۋلىق ساقتاۋ ۆيتسە-ءمينيسترى اجار عينيات اقتوبە وبلىسىنداعى بوساندىرۋ قىزمەتىن كورسەتەتىن مەديتسينالىق ۇيىمداردى تەكسەردى.