مەملەكەتتىك كىرىستەر كوميتەتى: 2020-جىل ءۇشىن تولەنەتىن كولىك سالىعى وسپەيدى
كولىك سالىعىن تولەۋ ەسەپتى جىلدان كەيىنگى جىلدىڭ 1- ساۋىرىنە اۋىستىرىلۋىنا بايلانىستى ازاماتتار اراسىندا سالىق كولەمى وسەدى دەگەن تۇسىنىسپەۋشىلىك تۋعان.
«سالىق تولەۋشى 2020-جىلعا ارنالعان سالىق مىندەتتەمەلەرىن 2021-جىلدىڭ 1- ساۋىرىنە دەيىن ورىنداۋى كەرەك. تيىسىنشە، كولىك سالىعىنىڭ سوماسىن ەسەپتەۋ كەزىندە 2020-جىلعى 1- قاڭتارداعى ايلىق ەسەپتىك كورسەتكىشتىڭ مولشەرى ەسكەرىلەدى. ەسكە سالا كەتەيىك، اتالعان مەرزىمدە ا ە ك 2651 تەڭگە. ياعني، سالىق وسى كورسەتكىشپەن ەسەپتەلەدى. 2021-جىلعا ارنالعان كولىك سالىعىن 2022-جىلدىڭ 1- ساۋىرىنە دەيىن تولەگەن كەزدە 2021-جىلدىڭ 1- قاڭتارىنداعى ا ە ك قولدانىلادى. دەمەك، 2020-جىل ءۇشىن كولىك سالىعى وسپەيدى»، دەلىنگەن حابارلامادا.
