سولتۇستىك قازاقستاندا «سولتۇستىك-2020» قىسقى سپورت ويىندارى ءوتىپ جاتىر
س ق و دەنە شىنىقتىرۋ جانە سپورت باسقارماسىنىڭ مالىمەتىنشە، «سولتۇستىك-2020» قىسقى سپورت ويىندارى بۇعان دەيىن ءوڭىردىڭ 13 اۋدانىندا ءوتتى. باعدارلاما اياسىندا پرەزيدەنتتىك كوپسايىستان، كەرلينگتەن، شاڭعى قوسسايىسىنان، كونكيمەن جۇگىرۋدەن جارىستار ءوتتى.
بيىل جارىس باعدارلاماسىنا العاش ەنگىزىلگەن شاڭعى قوسسايىسى بارىسىندا سپورتشىلار سلالومنان جانە 10 شاقىرىمعا جۇگىرۋدەن سايىستى. سولتۇستىك ءوڭىردىڭ تۇرعىندارىنا شاڭعى تەبۋ قيىندىق تۋدىرمايدى، ال سلالوم جارىسىندا قاتىسۋشىلارعا ءبىراز تەر توگۋگە تۋرا كەلدى. ناتيجەسىندە شالاقىن اۋدانىنىڭ سپورتشىسى ايان ءاشىموۆ ءبىرىنشى كەلدى.
«سلالوممەن كەيبىرىمىز بۇگىن عانا تانىستىق. ءبىزدىڭ وڭىردە سپورتتىڭ بۇل ءتۇرى دامىماعان. ۇنادى، قىزىقتى سپورت ءتۇرى. قارى تاۋ بولىپ ۇيىلەتىن سولتۇستىك قازاقستاندا سلالومدى دامىتۋ كەرەك دەگەن پىكىردەمىز»، - دەيدى جارىسقا قاتىسۋشىلار.
ون شاقىرىمعا شاڭعىمەن قۋالاپ جۇگىرۋدەن نيكيتا يۋگان الدىنا جان سالمادى. جالپى شاڭعى قوسسايىسىنان كوماندالىق ەسەپتە ع. مۇسىرەپوۆ اۋدانىنىڭ شاڭعىشىلارى جەڭىس تۇعىرىنان كورىندى. كونكي تەبۋدەن م. جۇمابايەۆ اۋدانىنىڭ سپورتشىلارى ءبىرىنشى ورىندى السا، كەرلينگتە تايىنشالىقتارعا تەڭ كەلەر جان تابىلمادى.
«سولتۇستىك-2020» قىسقى سپورتتىق ويىندار اياسىندا 8-9- اقپان كۇنى ءۇش اۋداندا شايبالى حوككەيدەن ايماقتىق جارىستار وتەدى. ال 13-16- اقپان كۇندەرى ەسىل اۋدانىندا رينگ-بەنديدەن (دوپتى حوككەي) وبلىستىق سايىستار جوسپارلانعان.
فينالدىق جارىستار تيميريازيەۆ ەلدى مەكەنىندە شايبالى حوككەيدەن، فۋت-زالدان، شورت-ترەكتەن جانە شاڭعى تەبۋدەن 20-23- اقپان ارالىعىندا وتپەك.
