2020 -جىلدان باستاپ قانداي جولدار اقىلى بولادى

ۆەدومستۆونىڭ مالىمەتىنە سەنسەك، 2024 -جىلعا دەيىن رەسپۋبليكالىق جەلىنىڭ 11 مىڭعا جۋىق شاقىرىمىن اقىلى اۆتوجولمەن قامتۋ كوزدەلىپ وتىر.

«اقىلى جول جوباسىن ەكى كەزەڭ بويىنشا ەنگىزەمىز. ءبىرىنشى كەزەڭ - 2020-2021 -جىلدار ارالىعىندا 6 مىڭ شاقىرىم اقىلى جول قولدانىسقا بەرىلەدى. اتاپ ايتقاندا، «باتىس ەۋروپا - باتىس قىتاي» ترانزيتتىك ءدالىزى، «نۇر- سۇلتان - قوستاناي - رەسەي شەكاراسى»، «شۋچينسك - پەتروپاۆل»، «نۇر- سۇلتان - پاۆلودار»، «قالباتاۋ - پاۆلودار - رەسەي شەكاراسى» (ومبىعا اپاراتىن جول)، «تاسكەسكەن - باقتى - قاپشاعاي - تالدىقورعان»، «اتىراۋ - ورال»، «اتىراۋ - دوسسور - بەينەۋ - اقجىگىت - وزبەكستان شەكاراسى» جانە «اقتاۋ - بەينەۋ» جولدارىنىڭ ۋچاسكەلەرى اقىلى بولادى»، - دەپ اتاپ ءوتتى مينيسترلىكتەن.

2022-2023 -جىلدار ارالىعىندا قالعان 5 مىڭ شاقىرىم جولدى ەنگىزۋدى كوزدەيتىن ەكىنشى كەزەڭ جۇزەگە اسىرىلادى.

يندۋستريا جانە ينفراقۇرىلىمدىق دامۋ مينيسترلىگى الداعى جىلدار قانشا شاقىرىم جول جوندەلەتىنىن دە ايتتى.

مەكەمەنىڭ مالىمەتىنشە، «نۇرلى جول» باعدارلاماسى اياسىندا 2020-2026 -جىلدار ارالىعىندا ۇزىندىعى 10 مىڭ شاقىرىمدى قۇرايتىن رەسپۋبليكالىق جولداردىڭ قۇرىلىسى مەن رەكونسترۋكسياسى جوسپارلانعان. ونىڭ 1373 شاقىرىمىندا 2020 -جىلى قوزعالىس باستالادى.

«وسىلايشا، «ورتالىق - وڭتۇستىك» باعىتى بويىنشا 311 شاقىرىم جول اشىلادى. «پەتروپاۆل - قورعان» تاسجولىنىڭ 37 شاقىرىمى پايدالانۋعا بەرىلەدى. «ورتالىق - شىعىس» جوباسى بويىنشا - 13 شاقىرىم، «قوستاناي - دەنيسوۆكا» جولىندا - 65 شاقىرىم، «اقتوبە - قاندىاعاش - ماقات» جولىندا - 160 شاقىرىم جول اشىلادى. سونداي-اق، 2020 -جىلى «اتىراۋ - استراحان» تاسجولىنىڭ 160 شاقىرىمى، «كوكتەرەك اسۋى» جوباسى بويىنشا - 32 شاقىرىم، «تالدىقورعان - وسكەمەن» تاسجولىندا - 384 شاقىرىم، «ۇزىناعاش - وتار» جولىنىڭ 96 شاقىرىمى، «ءۇشارال - دوستىق» جولىنىڭ 60 شاقىرىمى، «قالباتاۋ - مايقاپشاعاي» جولىنىڭ 155 شاقىرىمى قولدانىسقا بەرىلەدى»، - دەپ ءتۇسىندىردى مينيسترلىكتەن.