ەۋرو-2020: قازاقستان قۇراماسى بەلگياعا قانداي قاۋقار كورسەتەدى

نۇر- سۇلتان. قازاقپارات - بۇگىن فۋتبولدان 2020 -جىلعى ەۋروپا بىرىنشىلىگى ىرىكتەۋ كەزەڭىندە I توبىندا سىنعا ءتۇسىپ جاتقان قازاقستان مەن بەلگيا قۇرامالارى كەزدەسەدى.

 قازاقپارات ءتىلشىسى وسىعان وراي قوس قۇرامانىڭ بۇعان دەيىنگى كەزدەسۋلەرى، قارسىلاس كوماندانىڭ جەتكەن جەتىستىكتەرى جايىندا اقپارات ۇسىنادى.

ەستەرىڭىزگە سالا كەتەلىك، ءبىزدىڭ قۇراما بۇعان دەيىن ەكى كەزدەسۋ وتكىزدى. الدىمەن ءوز الاڭىندا شوتلانديانى 3:0 ەسەبىمەن جەڭدى. ودان كەيىن رەسەيگە 0:4 ەسەبىمەن جول بەرىپ قويدى. ازىرگە بەلگيا قۇراماسى بىردە- ءبىر ۇپايدى شاشاۋ شىعارعان جوق. العاشقى كەزدەسۋدە ءوز الاڭىندا رەسەيدى 3:1 ەسەبىمەن تىزە بۇكتىرسە، ودان كەيىن سىرت الاڭدا كيپردەن 2:0 ەسەبىمەن باسىم ءتۇستى. بەلگيا قۇراماسى اتالمىش توپتا جەكە- دارا كوش باستاپ تۇر.

بۇگىنگى قارسىلاسىمىز جايىندا جانكۇيەرلەر جاقسى بىلەدى. قۇراما ساپىندا الەمگە ايگىلى جۇلدىزدار از ەمەس. ولاردىڭ قاتارىندا تيبو كۋرتۋا، ەدەن ازار، اكسەل ۆيتسەل، رومەلۋ لۋكاكۋ، ديۆوك وريگي سىندى مىقتىلار بار. سونداي- اق، FIFA- نىڭ سوڭعى رەيتينگىندە اتالمىش قۇراما ءبىرىنشى ورىندا تۇر. وسىنىڭ ءوزى قارسىلاسىمىزدىڭ الەۋەتىن ايعاقتاي تۇسەدى. دەگەنمەن، ولار بۇگىنگى كۇنگە دەيىن الەم جانە قۇرلىق بىرىنشىلىكتەرىندە توپ جارىپ كورگەن جوق. ەۋروپا بىرىنشىلىگىندە 1972 -جىلى 3-ورىن ءۇشىن سايىستا ۆەنگريادان 2:1 ەسەبىمەن باسىم ءتۇسىپ، قولا جۇلدەنى قاناعات تۇتتى. ال 1980 -جىلى فينالدا گەرمانياعا 1:2 ەسەبىمەن جەڭىلىپ، «كۇمىس» الدى. الەم بىرىنشىلىگىندە جۇلدەگەرلەر قاتارىنان 2018 -جىلى عانا كورىندى. رەسەيدە وتكەن ءدۇبىرلى دودادا انگليانى 2:0 ەسەبىمەن جەڭىپ، الەم بىرىنشىلىگىندە ءۇشىنشى ورىن الدى.

قازاقستان قۇراماسى ءۇشىن بەلگيا وتە جاقسى تانىس. بۇعان دەيىن ەكى قۇراما ءتورت مارتە كەزدەستى. ونىڭ ەكەۋىندە تەڭ ناتيجە تىركەلسە، ەكەۋىندە قارسىلاستارىمىز ءۇش ۇپايدى ولجالادى. ايتا كەتەرلىگى، قوس قۇراما بۇعان دەيىن تەك ەۋروپا بىرىنشىلىگى ىرىكتەۋ كەزەڭدەرىندە جولىققان. الدىمەن 2006 -جىلدىڭ 16 - تامىزىندا ءبىزدىڭ جىگىتتەر بەلگيادا اتالمىش قارسىلاسىمەن 0:0 ەسەبىمەن تەڭ وينادى. ال 2007 -جىلدىڭ 12 - قىركۇيەگىندە ءبىزدىڭ الاڭدا وتكەن كەزدەسۋدە قوس قۇراما 2:2 ەسەبىنە قاناعات ءبىلدىردى. سول جولى ا توبىنداعى سەگىز قۇراما اراسىندا بەلگيا - 5، قازاقستان 6 - ورىنعا يە بولدى. ايتا كەتەيىك، ءبىزدىڭ قۇراماعا 2006-2008 -جىلداردا گوللانديالىق مامان ارنو پايپەرس جەتەكشىلىك ەتتى.

بۇدان كەيىن ەكى قۇراما 2012 -جىلعى ەۋروپا بىرىنشىلىگى ىرىكتەۋ كەزەڭىندە تاعى دا ا توبىندا جولىقتى. 2010 -جىلدىڭ 8 - قازانىندا نۇر- سۇلتان قالاسىندا وتكەن ويىندا بەلگيا قۇراماسى 2:0 ەسەبىمەن باسىم تۇسسە، 2011 -جىلدىڭ 8 ماۋسىمىندا ولار ءوز الاڭىندا 4:1 ەسەبىمەن جەڭىپ كەتتى. بۇل جىلداردا نەمىس بەرند شتورك پەن چەح ميروسلاۆ بەرانەك باس باپكەر قىزمەتىن اتقاردى.

بۇگىنگى كەزدەسۋ الدىندا ءبىزدىڭ قۇراما ساپىنان ءبىرقاتار نەگىزگى ويىنشىلار جاراقات الىپ قالدى. ولاردىڭ قاتارىندا يۋريي لوگۆينەنكو، عافۋرجان سۇيىمبايەۆ، دميتريي شومكو بار.

اتالمىش كەزدەسۋ 9 - ماۋسىم كۇنى نۇر- سۇلتان ۋاقىتىمەن 00.45-تە باستالادى. كەزدەسۋ «QazSport»  تەلەارناسىنان كورسەتىلەدى.

اۆتور: ءادىلجان ۇمبەت