10:30, 22 - تامىز 2016 | GMT +5
وليمپيادا-2020 ەڭ جوعارى دەڭگەيدە ۇيىمداستىرىلاتىن بولادى - سيندزو ابە
استانا. قازاقپارات - جاپونيا پرەمەر- ءمينيسترى سيندزو ابە 2020 -جىلى توكيودا وتەتىن جازعى وليمپيادا ويىندارىن ەڭ جوعارى دارەجەدە ۇيىمداستىرۋعا ەل ۇكىمەتى بارىنشا كۇش سالاتىنىنا ۋادە ەتتى.
بۇل جونىندە ول جەكسەنبى كۇنى ريو- دە- جانەيروداعى ويىندارعا قاتىسقان جاپوندىق وليمپيادا قۇراماسىمەن كەزدەسۋدە مالىمدەدى، دەپ جازدى ت ا س س.
«ءبىز 2020 -جىلى وليمپيادا جانە پاراليمپيادا ويىندارىن وتكىزۋگە قاجەتتى دۇنيەنىڭ ءبارىن جاسايمىز. توكيوداعى ويىندار الەمدەگى بارشا حالىققا ۇنايدى دەپ ۇمىتتەنەمىن»، - دەپ كيودو اگەنتتىگى پرەمەر- ءمينيستردىڭ ءسوزىن كەلتىردى.
سونىمەن بىرگە، ابە وليمپيادادا ويىن كورسەتكەن جاپون سپورتشىلارىنا العىس ءبىلدىردى. «جاپونياعا ورالعان سوڭ، سەندەر ءوز اسەرلەرىڭ، ءوز تاجىريبەلەرىڭ جايلى باسقالارمەن بولىسۋلەرىڭدى قالايمىن. ءبارىمىز بىرگە توكيوداعى وليمپيادا ويىندارىنا قادام باسامىز»، - دەپ تولىقتىردى ءوز ءسوزىن جاپونيا ۇكىمەتىنىڭ باسشىسى.
