ەلوردادا 2020-جىلى 3 ميلليون شارشى مەتر تۇرعىن ءۇي پايدالانۋعا بەرىلدى - التاي كولگىنوۆ
بۇل تۋرالى قالا تۇرعىندارىمەن ەسەپ بەرۋ كەزدەسۋىندە ەلوردا اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.
«2020-جىلى كوروناۆيرۋس پاندەمياسىنا قاراماستان، ەلوردا اكىمدىگى ازاماتتار مەن قالا ءۇشىن ماڭىزدى جوبالار ءۇشىن جەكە ينۆەستيتسيالاردى تارتۋ بويىنشا جۇمىستاردى توقتاتقان جوق. بىلتىر ەلورداعا 1,1 تريلليون تەڭگە تارتىلدى. بۇل 2019-جىلعا قاراعاندا 21,5 پايىزعا ارتىق»، - دەدى ول.
قالا باسشىسى 2020-جىل وڭاي بولماعانىن جاسىرمادى.
«ءبىراق پاندەميانىڭ ۋاقىتشا ەكەنىن ءتۇسىنۋ كەرەك. قالادا تۇرعىن ءۇي مەن الەۋمەتتىك نىسانداردى، ينفراقۇرىلىم جانە تاعى باسقالارىن سالۋدى مىندەتتى تۇردە جالعاستىرۋ قاجەت. كارانتين كەزىندە قۇرىلىس جۇمىستارى توقتاتىلعان جوق. جۇمىستار سانيتارلىق نورمانى قاتاڭ ساقتاۋ ارقىلى جۇرگىزىلدى. 2020-جىلى ەلوردادا 3 ميلليون شارشى مەتر تۇرعىن ءۇي سالىنىپ، پايدالانۋعا بەرىلدى. بۇل 2019-جىلعا قاراعاندا ەكى ەسەگە كوپ»، - دەدى التاي كولگىنوۆ.
ونىڭ اتاپ وتۋىنشە، وتكەن جىلى ModeX ءۇي كومبيناتىنىڭ جۇمىسى ىسكە قوسىلدى. ءۇي كومبيناتتارى تۇرعىن ءۇي قۇرىلىسىنا كومەكتەسەدى جانە قۇرىلىستىڭ ۋاقىتىن قىسقارتۋعا، تۇرعىن ءۇي قۇنىن تومەندەتۋگە، ءۇي ساپاسىن ارتتىرۋعا مۇمكىندىك بەرەدى.
