بيىل 2020-2025 -جىلدارعا ارنالعان يندۋستريالاندىرۋ باعدارلاماسى بەكىتىلەدى
بۇل تۋرالى بۇگىن ۇكىمەت ۇيىندەگى باسپا ءسوز ءماسليحاتىندا ق ر يندۋستريا جانە ينفراقۇرىلىمدىق دامۋ ۆيتسە- ءمينيسترى امانياز ەرجانوۆ ايتتى، دەپ حابارلايدى قازاقپارات ءتىلشىسى.
«ەلباسىنىڭ تاپسىرماسى بويىنشا جىل سوڭىنا دەيىن 2020-2025 -جىلدارعا ارنالعان يندۋستريالاندىرۋ باعدارلاماسىن بەكىتۋىمىز كەرەك. وزدەرىڭىزگە بەلگىلى، بۇل نەگىزگى تاسىلدەر يندۋستريالىق- يننوۆاتسيالىق دامۋ تۇجىرىمداماسىنا ەنگىزىلگەن. ول وتكەن جىلدىڭ جەلتوقسان ايىندا ۇكىمەتتىڭ قاۋلىسىمەن بەكىتىلدى. باعدارلامانىڭ ماقساتى وڭدەۋشى ونەركاسىپتىڭ حالىقارالىق باسەكەگە قابىلەتتىلىگىن ىنتالاندىرۋ بولىپ تابىلادى. تۇتاستاي العاندا، يندۋستريالىق- يننوۆاتسيالىق ساياسات ساباقتاستىقتى ساقتايدى جانە ەكسپورتقا باعدارلانعان كاسىپورىندار مەن ەڭبەك ونىمدىلىگىن ارتتىرۋعا باسا نازار اۋدارا وتىرىپ، وڭدەۋ ونەركاسىبىن دامىتۋعا شوعىرلاندىرىلاتىن بولادى»، - دەدى ۆيتسە- مينيستر.
وسى رەتتە امانياز ەرجانوۆ الداعى ۋاقىتتا بەكىتىلەتىن 2020-2025 -جىلدارعا ارنالعان يندۋستريالاندىرۋ باعدارلاماسىنىڭ نەگىزگى جاڭالىقتارىنا توقتالدى.
«ءبىرىنشى، وڭدەۋشى ونەركاسىپتىڭ بارلىق سالالارىنداعى ءتيىمدى وندىرۋشىلەردى قولداۋ پايداسىنا وراي سالالىق باسىمدىقتاردان باس تارتامىز. ەكىنشى، بيۋدجەتتىك رەسۋرستاردى پايدالانۋعا باقىلاۋدى كۇشەيتۋ جانە ۇتىمدى پايدالانۋ ماقساتىندا كاسىپورىنداردى قولداۋ ناقتى كورسەتكىشتەرگە قول جەتكىزۋ بويىنشا بيزنەستىڭ قارسى مىندەتتەمەلەرىنە الماسۋ ءۇشىن ۇسىنىلاتىن بولادى. ءۇشىنشى، كاسىپورىنداردى جاڭعىرتۋ مەن تەحنولوگيالىق دامىتۋعا باعىتتالعان قولدانىستاعى قۇرالدار جەتىلدىرىلەدى جانە جاڭا قۇرالدار ازىرلەنەدى»، - دەدى ول.
ول قازىرگى تاڭدا باعدارلاما جوباسى ازىرلەنىپ، مۇددەلى مەملەكەتتىك ورگاندارمەن كەلىسۋ ۇستىندە ەكەنىن ايتتى.
اۆتور: مارلان جيەمباي