10:35, 14 - قاڭتار 2017 | GMT +5
بيىل الەمدەگى جۇمىسسىزدار سانى 201 ميلليونعا جەتۋى مۇمكىن
استانا. قازاقپارات - بيىل الەمدەگى جۇمىسسىزدار سانى ارتىپ، 201 ميلليون ادامعا دەيىن جەتۋى مۇمكىن.

بۇل تۋرالى حالىقارالىق ەڭبەك ۇيىمىنا سىلتەمەمەن «حابار 24» حابارلادى.
ال كەلەر جىلى ولاردىڭ قاتارىن تاعى 3 ميلليونعا جۋىق ادام تولىقتىرۋى ىقتيمال. ويتكەنى قازىر ەڭبەككە جارامدى جاستاعى حالىق سانىنىڭ ءوسۋ قارقىنى جاڭا جۇمىس ورىندارىنىڭ قۇرىلۋىنان گورى وزىپ وتىر. بۇگىندە مۇنداي جاعداي اسىرەسە باتىس ەۋروپادا انىق بايقالادى. حالىقارالىق ۇيىم وكىلدەرىنىڭ حابارلاۋىنشا، تاپ قازىرگى تاڭدا جالاقىسى تومەن حالىق سانى دا ايتارلىقتاي ارتىپ كەلەدى.
«ساراپشىلار 2017 -جىلى ەكونوميكالىق ءوسىم بايقالادى دەگەن بولجام جاساپ وتىر. الايدا ول جۇمىسسىزدىق دەڭگەيىنىڭ جاھاندىق اۋقىمدا ءوسۋىن تەجەي المايدى. بۇل دامۋشى ەلدەردەگى ەكونوميكالىق جاعدايدىڭ السىرەگەنىن ايگىلەي تۇسەدى»، - دەيدى حالىقارالىق ەڭبەك ۇيىمىنىڭ باس ديرەكتورى گاي رايدەر.