ناۋرىز-2019: قوستانايدىڭ ۇزدىك كەلىندەرى مەن پالاۋشىلارى انىقتالدى
بۇگىن قوستانايدىڭ باستى الاڭىندا ءداستۇر بويىنشا كيىز ءۇي قالاشىعى قۇرىلدى. اۋەلى وبلىس اكىمى ارحيمەد مۇحامبەتوۆ قوستانايلىقتاردى ۇلىق مەرەكەمەن قۇتتىقتادى.
«ناۋرىز - جالپىحالىقتىق كوكتەم مەرەكەسى. بىرلىك پەن تاتۋلىققا شاقىرادى. كوپتەگەن جىلدار بويى ءبىز ەلىمىزدىڭ بەرەكە- بىرلىگىنىڭ سيمۆولىنا اينالعان ناۋرىز مەرەكەسىن تويلايمىز. اتا- بابالارىمىزدىڭ داستۇرلەرىن جالعاستىرىپ، سول ارقىلى ولاردىڭ تاريحي قۇندىلىعىن ساقتايمىز. وسى جىلى ءبىز ناۋرىزدى ەرەكشە سەزىممەن قارسى الامىز. سەبەبى، مەرەكە قارساڭىندا ەلىمىزدىڭ تۇڭعىش پرەزيدەنتى نۇرسۇلتان نازاربايەۆ ءوز وكىلەتتىگىن دوعارۋ تۋرالى جاۋاپتى شەشىم قابىلدادى. نۇرسۇلتان ءابىش ۇلىنىڭ تابىستى قازاقستاندى قۇرۋداعى تاريحي ءرولى مەن وراسان زور ەڭبەگىن باعالاۋ قاجەت. ەلباسى باستامالارىنىڭ ارقاسىندا وسى جىلدار بويى ەلىمىز بەيبىتشىلىك پەن تۇراقتىلىق يدەياسىن جۇزەگە اسىرىپ كەلەدى»، - دەدى ءوڭىر باسشىسى.
مۇنان سوڭ ۇزدىك بەزەندىرۋ بايقاۋىنا كاسىپورىندار، كاسىپكەرلەر مەن وقۋ ورىندارى قاتىستى. ولار كيىز ءۇي ىشىندە مەرەكەلىك داستارحان جايدى. سالدەن سوڭ «پالاۋ - داستارحان قازىناسى» كورمەسى باستالدى. وبلىستىڭ ءار اۋدانىنا كەلگەن پالاۋ جاساۋشىلار سىنعا ءتۇستى. سولاردىڭ ءبىرى - سايد سۋلتونحودجايەۆ وزبەكستاننان كوشىپ كەلگەن. پالاۋدى 13 جاسىنان دايىندايدى.
«بۇگىن قوستانايلىقتارعا نامانعان پالاۋىنىڭ ءدامىن تاتتىردىق. بىلتىر دا پالاۋ جاساۋ سايىسىنا قاتىسىپ، جەڭىمپاز اتانعانمىن. بيىل دا ءۇمىت كوپ. ويتكەنى، باسقاشا رەتسەپت ۇسىنىپ وتىرمىز»، - دەيدى سايىس قاتىسۋشىسى.
وسى ۋاقىتتا «اجەمنىڭ ءتاتتى باۋىرساقتارى» اتتى كەلىندەر بايقاۋى قاتار ءوتتى. سونداي-اق، قالا ورتالىعىندا تەاترلاندىرىلعان قويىلىمدار، حورلار شەرۋى جانە مەرەكەلىك كونتسەرت ناۋرىزدىڭ كورىگىن قىزدىردى. ءتۇس الەتىندە قالانىڭ جاس ارتىستەرىنىڭ قاتىسۋىمەن «ناۋرىزبەك- ناۋرىزگۇل!» اتتى كوكتەمگى ەسىمدەر مەرەكەسى ۇيىمداستىرىلدى.
مەرەكەلىك شارالار لەگى «ارمانداستار» ۆوكالدىق ستۋدياسى جانە «اق داريعا» قازاق اندەرى حورىنىڭ كونسەرتىمەن اياقتالدى.