الماتى وبلىسىندا «سالبۋرىن-2019» ساياتشىلار مەن اڭشىلار جارىسى ءوتتى
وعان ەلىمىزدىڭ ءار وڭىرىنەن 25 اڭشى قاتىستى دەپ حابارلايدى قازاقپارات ءتىلشىسى.
ەلباسى نۇرسۇلتان نازاربايەۆتىڭ «ۇلى دالانىڭ جەتى قىرى» اتتى باعدارلامالىق ماقالاسى اياسىندا ۇيىمداستىرىلعان شارا ءداستۇرلى قۇسبەگىلەر جارىسىنان وزگەرەك بولدى. اڭشىلار «جەتىسۋ»، «التاي»، «ارقا»، «ەرەنقابىرعا» جانە «تارباعاتاي» اتتى 5 توپقا ءبولىنىپ، دوداعا ءتۇستى. سايىس ەكى كۇنگە سوزىلدى. العاشقى كۇنى قۇسبەگىلەر قۇستارىن، اڭشىلار قۇماي تازىلارىن بابىنا كەلتىرىپ، كەشقۇرىم اڭشىلار قوسىندا اس ازىرلەپ، ءتۇننىڭ ءبىر ۋاعىنا دەيىن اڭشىلىق پەن ساياتشىلىق تۋرالى اڭگىمە ءوربىتتى.
جارىستىڭ ەكىنشى كۇنى اڭشىلار اتتارىن ەرتتەپ، تازىلارىن ەرتىپ، قۇستارىن قولعا قوندىرىپ، تاۋ تاستى ارالاپ كەتتى. «ارقا» كومانداسى 1 تۇلكى مەن 1 قويان اۋلاسا، «جەتىسۋ» كومانداسى 3 قويان مەن 3 قىرعاۋىل الىپ، قانجىعاسىن مايلادى. تاعلىمى مول، رۋحاني ازىق بولار شارانى ۇيىمداستىرۋشى - رەسپۋبليكالىق «قىران» فەدەراتسياسى مەن الماتى وبلىستىق سپورت جانە دەنەشىنىقتىرۋ باسقارماسى.
جارىس قورتىندىسى بويىنشا «جەتىسۋ» كومانداسى ۇزدىك شىعىپ، ارنايى كۋبوكقا يە بولدى. اڭشىلار مەن قۇسبەگىلەردىڭ كوڭىلىنەن شىققان شارا كەلەر جىلى دا جالعاسىن تاپپاق.