استانادا 2018-جىلدىڭ ەڭ اقىلدى وقۋشىلارى انىقتالدى
بايقاۋدى ق ر تۇڭعىش پرەزيدەنتى - ەلباسى قورى مەن مەملەكەتتىك ءتىلدى دامىتۋ قورى جاريالاعان.
ق ر تۇڭعىش پرەزيدەنتى - ەلباسى قورىنان ءمالىم ەتكەندەي، «كىم بىلگىش؟» تۋرنيرى «رۋحاني جاڭعىرۋ» باعدارلاماسى اياسىندا ءوتتى.
جوبانىڭ ماقساتى - وقۋشىلاردىڭ ينتەلەكتۋالدىق جانە تانىمدىق قابىلەتتەرىن ىنتالاندىرۋ، شىعارماشىلىق جانە ءبىلىم دەڭگەيىن كوتەرۋ، IT سالادا بىلىمدەرىن قالىپتاستىرۋ، دارىندى بالالاردى انىقتاۋ جانە قولداۋ، باسەكەلەستىك رۋحىن دامىتۋ، سونىمەن قاتار وقۋشىلاردىڭ بوس ۋاقىتىن ءتيىمدى وتكىزۋگە ىقپال ەتۋ.
تۋرنير ءۇشىنشى رەت وتكىزىلۋدە. الدىڭعى ەكى ويىن ناتيجەسى بويىنشا رەسپۋبليكانىڭ ءتۇرلى ايماقتارىنان كەلگەن جوعارعى سىنىپتىڭ 22 وقۋشىسى باعالى سىيلىقتار الدى.
«كىم بىلگىش؟» تۋرنيرى ءساتتى جوبا بولعاندىقتان، ويىن جىلدان-جىلعا تانىمال بولىپ كەلەدى. سول سەبەپتى ونى 2019-جىلى دا وتكىزۋ جوسپاردا بار»، - دەدى ق ر تۇڭعىش پرەزيدەنتى - ەلباسى قورىنىڭ ديرەكتورى قانات جۇمابايەۆ
ايتا كەتەيىك، «كىم بىلگىش؟» ويىنى 30 مىڭنان استام سۇراقتان تۇراتىن موبيلدىك قوسىمشا. وندا سپورت، ⅩⅩ عاسىر، ХХІ عاسىر، الەم، ونەر، قازاقستان تاريحى، قازاقستان تابيعاتى، دەنساۋلىق، عىلىم تاقىرىپتارى قامتىلعان. ەكى كەزەڭنەن تۇراتىن تۋرنير ونلاين تۇرىندە، جازعى دەمالىس كەزىندە ءوتتى. _
بيىل وعان 7 مىڭعا جۋىق مەكتەپ وقۋشىسى قاتىستى. فينالعا ەڭ كوپ ۇپاي جيناعان 8 وقۋشى ءوتتى. اقتىق ويىن استانا قالاسىندا بولدى. ول جەردە ۇزدىك ويىنشىلار ەرۋديتسيا جانە جىلدامدىق بويىنشا جارىستى.
وسىلايشا، قازاق ءتىلدى ويىنشىلار اراسىندا ءبىرىنشى ورىنعا ورال قالاسىنان 11-سىنىپ وقۋشىسى يسابەك مۇراتوۆ، ەكىنشى ورىنعا الماتى قالاسىنان 11-سىنىپ وقۋشىسى نۇرايشا قايىسبەكوۆا، ءۇشىنشى ورىنعا شىمكەنت قالاسىنان 10-سىنىپ وقۋشىسى ءامىرجان قۇدايبەرگەن يە بولدى.
ورىس ءتىلدى ويىنشىلار اراسىندا ءبىرىنشى ورىندى سەمەي قالاسىنان 11-سىنىپ وقۋشىسى انتون مانۋلەنكو، ەكىنشى ورىندى الماتى وبلىسىنان 10-سىنىپ وقۋشىسى راميليا احمەت، ءۇشىنشى ورىندى الماتى قالاسىنان 10-سىنىپ وقۋشىسى ەراسىل ەرنار ۇلى يەلەندى.
تۋرنير جەڭىمپازدارىنا «2018-جىلدىڭ ەڭ اقىلدى وقۋشىسى» ديپلومدارى، نوۋتبۋك، پلانشەت، سمارتفون سياقتى باعالى سىيلىقتار تابىستالدى.