پارازيادا-2018: باستى قارسىلاستارىمىز - قىتاي مەن يران
ەل سەنىم ارتقان سپورتشىلارمەن بىرگە وتىرىپ ويناۋ ۆولەيبولىنان قازاقستان قۇراماسىنىڭ دا التىن مەدالعا ءۇمىتى زور. قىتاي مەن يران سەكىلدى كىل مىقتىلارىمەن بۇل كۇندە تەرەزەسى تەڭ دارەجەدە ونەر كورسەتەتىن ۇلتتىق قۇرامامىز الەمنىڭ ۇزدىك وندىعىنا ەنەدى.
قازاقپارات ءتىلشىسى جارىس الدىندا ەرىك-جىگەرى ەرەك، رۋحى اسقاق سپورتشىلارمەن كەزدەسىپ، ۇلتتىق قۇرامانىڭ باس باپكەرى باۋىرجان تاقاۋوۆپەن اڭگىمەلەسىپ قايتتى.
«باستى قارسىلاستارىمىز - قىتاي مەن يران»
وتىرىپ ويناۋ ۆولەيبولىنان ۇلتتىق قۇرامامىز بۇگىنگى كۇنى ەلورداداعى پاراليمپيادالىق جاتتىقتىرۋ ورتالىعىندا دايىندالىپ جاتىر. الەمدىك ستاندارتقا ساي بىرەگەي ورتالىق ق ر ۇلتتىق پاراليمپيادالىق كوميتەتىنىڭ پرەزيدەنتى قايرات بورانبايەۆتىڭ قولداۋىمەن سالىنعان.
كوماندانىڭ باس جاتتىقتىرۋشىسى باۋىرجان تاقاۋوۆتىڭ ايتۋىنشا، قازاقستاندا وتىرىپ ويناۋ ۆولەيبولى 1987-جىلدان بەرى بار ەكەن. 1991-جىلدان 1999-جىلعا دەيىن بەلگىلى باپكەر جانىبەك ساۋرانبايەۆ وسى سپورت تۇرىنەن قازاقستان قۇراماسىن جاتتىقتىرىپ، كوماندا 1994-جىلى بەيجىڭدە، 1998-جىلى تايلاندتا وتكەن ازيا ويىندارىنىڭ جەڭىمپازى اتانعان. 2002-جىلى كورەيانىڭ پۋسان قالاسىندا وتكەن ازيا ويىندارىندا كۇمىس مەدالعا يە بولعان.
«ول كەزدەگى ويىنشىلاردىڭ ءبارى جاسى كەلگەننەن كەيىن سپورتتان كەتتى. بۇگىنگى كۇنى ءبىزدىڭ ۇلتتىق قۇرامانىڭ نەگىزگى بولىگىن اتىراۋ كومانداسىنىڭ سپورتشىلارى قۇرايدى. ونىڭ ىشىندە ۇشەۋى قىزىلوردادان، قالعانى تۇگەلىمەن اتىراۋدىڭ جىگىتتەرى. 2009-جىلى جاستار اراسىندا وتكەن الەم چەمپيوناتىندا ءبىزدىڭ كوماندا قولا جۇلدە جەڭىپ الدى. 2010-جىلى امەريكانىڭ وكلاحوما شتاتىندا وتكەن الەم چەمپيوناتىنىڭ جەڭىمپازى اتاندىق. قازىرگى تاڭدا ءبىزدىڭ كوماندا الەمدىك دارەجەدە ۇزدىك وندىقتىڭ قاتارىندا. كۇنى كەشە الەم چەمپيوناتىندا توعىزىنشى ورىن الىپ، ەۋروپانىڭ ازۋلى ءۇش كومانداسى، سونىڭ ىشىندە پاراليمپيادا ويىندارىنىڭ قولا جۇلدەگەرى گەرمانيا قۇراماسىن، گوللانديا مەن حورۆاتيانى ۇتتىق»، - دەيدى قۇرامانىڭ باس باپكەرى.
وتىرىپ ويناۋ ۆولەيبولىنىڭ ساڭلاقتارى قازىرگى تاڭدا پارازيادا ويىندارىنا قىزۋ دايىندالىپ جاتىر. جاتىن ورىنى مەن تاماعىنىڭ ءبارى دە بىرەگەي ورتالىقتا قاراستىرىلعان. ءساتىن سالسا، 1- قازان كۇنى سپورتشىلار ساپارعا اتتانىپ كەتپەك. البەتتە، كەز كەلگەن سپورت تۇرىنەن الەمنىڭ ۇزدىك دەگەن كوماندالارى بار. باۋىرجان تاقاۋوۆتىڭ ايتۋىنشا، ۇلتتىق قۇرامانىڭ ماقساتى - وتىرىپ ويناۋ ۆولەيبولىنان يران، قىتاي، يراك، جاپونيا جانە كورەيا كوماندالارىن جەڭۋ. ايتا كەتەرلىگى، يراندا بۇل سپورت وتە جۇيەلى تۇردە جولعا قويىلعان. ول ەلدە ءدال وسىنداي وتىرىپ ويناۋ ۆولەيبولىنان 130 كوماندا بار ەكەن.
«اماندىق بولسا، جىگىتتەرىمىز ليتسەنزيا الىپ، پاراليمپيادا ويىندارىنا قاتىسادى دەگەن ۇمىتتەمىز. يران الەم چەمپيوناتىندا توپ جارىپ، ليتسەنزيا الىپ قويدى. ەندى وسى جاكارتادا وتەتىن پارازيادادا ءبىر ليتسەنزيا بەرىلەدى. سودان ءۇمىت بار. ۇلتتىق قۇراما ساپىنان 12 سپورتشىمىز ەل نامىسىن قورعايتىن بولادى. جالپى، جاكارتادا ون كوماندا باس جۇلدەگە تالاسادى»، - دەيدى باپكەر.
باۋىرجان تاقاۋوۆتىڭ ايتۋىنشا، ۇلتتىق قۇراما ساپىنداعى سپورتشىلاردىڭ ءبارى دە ءبىر كەزدە ون ەكى مۇشەسى ساۋ ازاماتتار بولعان. الايدا تاعدىر جازۋىمەن ءبىرى كولىك اپاتىنا، ەندى ءبىرى تاعى باسقا وقىس وقيعاعا تاپ بولعان ادامدار. سونىڭ ءبىرى ەرىك قاسقابايەۆ جەتى جاسىندا مەكتەپتەن قايتىپ بارا جاتىپ پويىزدىڭ استىنا ءتۇسىپ قالعان ەكەن. تاعدىر تالكەگىنە تاپ بولسا دا، بالا كەزدەن سپورتقا قۇمار ەرىك بۇگىن، مىنە، ۇلتتىق قۇراما ساپىنداعى ۇزدىك سپورتشىلاردىڭ ءبىرى بولىپ وتىر.
«وسى جاسقا دەيىن ءبىرشاما سايىستارعا قاتىسىپ، ۇلتتىق قۇراما ساپىندا ونەر كورسەتۋ باقىتى بۇيىردى. ازيا ويىندارىندا وسىمەن ءتورتىنشى رەت باعىمىزدى سىناعالى وتىرمىز. ءبىزدىڭ قۇرامانىڭ ويىنشىلارىنىڭ ءبارى جاس. جارىستار مەن سپورتتىق ساپارلار بىزدە ءجيى بولىپ تۇرادى. تۇراقتى تۇردە جارىستارعا قاتىسىپ تۇرماساق، كوماندامەن قايتا بەيىمدەلۋ وتە قيىنعا تۇسەدى. قارسىلاستارىمىز كۇنىنە ەكى رەت 6-7 ساعاتتان دايىندالاتىنىن ەستىدىك. چەمپيون اتانۋ ءۇشىن كوپ تەر توگۋ كەرەك»، - دەيدى ەرىك.
جاسى وتىزدان اسىپ كەتكەن ەرىك بالا كەزىندە باۋىرجان تاقاۋوۆتى كەزدەستىرگەلى جانىنان قالماعان.
«وتىرىپ ويناۋ ۆولەيبولىنىڭ كادىمگى ۆولەيبولدان كوپ ايىرماشىلىعى جوق. دوپ بەرىس كەزىندە بلوك قويۋعا بولادى. سەتكانىڭ بيىكتىگى 1 مەتر 15 سانتيمەتر. ءبىزدىڭ ەڭ بويشاڭ سپورتشى الەكساندر دەمەۋوۆتىڭ بويى - 2 مەتر 18 سانتيمەتر. الەكەمىز، شابۋىلعا دا مىقتى. التىن مەدال الۋعا بارىمىزدى سالامىز»، - دەيدى ەرىك قاسقابايەۆ.
كورەيا باپكەرى: قازاقستاندى ارنايى تاڭدادىق
پاراليمپيادالىق جاتتىقتىرۋ ورتالىعىنا كىرگەنىمىزدە ۇلتتىق قۇراما سپورتشىلارىمەن بىرگە وڭتۇستىك كورەيانىڭ كەنگيدو قالاسىنان كەلگەن سپورتشىلار دا ءجۇر ەكەن. ەستىپ بىلگەنىمىزدەي، قازاقستان رەسپۋبليكاسىنىڭ ۇلتتىق پاراليمپيادا كوميتەتى مەن وڭتۇستىك كورەيا ەلىنىڭ «كەنگي-دو» سپورتتىق قاۋىمداستىعى ىنتىماقتاستىق تۋرالى كەلىسىمگە كەلىپ، وسى كەلىسىم اياسىندا تاجىريبە الماسۋ ءجۇرىپ جاتىر. ۇلتتىق پاراليمپيادا كوميتەتىنىڭ مەنەدجەرى راۋان ءساتجانوۆتىڭ ايتۋىنشا، وسىعان دەيىن قازاقستاننىڭ وتىرىپ ويناۋ ۆولەيبولشىلارى وڭتۇستىك كورەياعا بارىپ وقۋ-جاتتىعۋ جيىنىنان ءوتىپ كەلگەن. ەندىگى كەزەكتە كورەيالىق سپورتشىلار استاناعا كەلىپ وتىر.
كەنگيدو قالاسىنان كەلگەن، اتالمىش قالاداعى وتىرىپ ويناۋ ۆولەيبولىنان جاساقتالعان قۇرامانىڭ باس باپكەرى جە جيڭ ۆوندى سوزگە تارتتىق. ونىڭ ايتۋىنشا، وتىرىپ ويناۋ ۆولەيبولىنان قازاقستان ۇزدىكتەردىڭ قاتارىندا بولعاندىقتان، ءوزارا ىنتىماقتاستىققا كورەيالىقتاردىڭ وزدەرى مۇددەلىك تانىتقان.
«سوڭعى ءۇش كۇندە قازاقستان سپورتشىلارىنىڭ ونەرىن ۇزدىكسىز تاماشالاپ كەلەمىن. كۇنى كەشە باۋىرجان تاقاۋوۆپەن ءبىرشاما تىلدەستىك. ءبىزدىڭ سپورتتا ەڭ مىقتى كوماندالار قىتاي مەن يران دەسەك تە، مەنىڭ ويىمشا، قازاقستان قۇراماسىنىڭ دايىندىعىنا قاراپ وتىرىپ، مىقتى كوماندالاردى ۇتا الاتىنىنا كوزىم جەتىپ وتىر»، - دەيدى ول.
وڭتۇستىك كورەيادان كەلگەن باپكەردەن ءوز ەلىندە مۇمكىندىگى شەكتەۋلى سپورتشىلارعا مەملەكەت تاراپىنان قانشالىقتى قولداۋ كورسەتىلەتىنىن سۇراپ كوردىك.
«ءبىزدىڭ ەلدە دە پاراليمپياداشىلارعا ارنالعان سپورتتىق ورتالىقتار بارشىلىق. كورەيادا ءاربىر پاراليمپياداشى سپورتشىنىڭ ءوزىنىڭ جۇمىسى بار. ياعني، سپورتتىق جيىن باستالعان كەزدە ولارعا تاۋلىكتىك نەمەسە ايلىق اقى بەرىلىپ، جارىسقا جىبەرىلەدى. ۇلتتىق قۇرامالاردا دا سولاي. دەسە دە، سىزدەردەگىدەي پاراليمپيادا ويىندارىندا جوعارى جۇلدەگە قول جەتكىزگەندەر قاراپايىم سپورتشىلارعا بەرىلەتىن سىياقىعا تەڭ سوما الادى»، - دەيدى جە جيڭ ۆون.
«پارازيادا ويىندارىنان قۇر قايتقان ەمەسپىز»
بۇدان كەيىن قازاقستان رەسپۋبليكاسى پاراليمپيادا كوميتەتىنىڭ سپورت بويىنشا مەنەدجەرى راۋان ساتجانوۆپەن اڭگىمەلەسۋدىڭ ءساتى ءتۇستى. مەنەدجەر اتاپ وتكەندەي، يندونەزيادا قازاقستاننان 93 سپورتشى وتىرىپ ويناۋ ۆولەيبولى، پارا پاۋەرليفتينگ، ءجۇزۋ، جەڭىل اتلەتيكا، ساداقپەن اتۋ، وق اتۋ تۇرلەرىنەن ەل نامىسىن قورعاۋعا بارا جاتىر.
«قازىر قانشا مەدالعا ءۇمىتتى بولىپ وتىرعانىمىزدى تاپ باسىپ ايتا المايمىز. ءبىراق، قورجىنىمىز بوس كەلگەن كەز بولعان ەمەس. ءبىز ازيا شەڭبەرىندە باسەكەلەستىك تانىتا الاتىن بىرنەشە سپورت ءتۇرى بار. ناقتىراق ايتقاندا، ءجۇزۋ سپورتىنان بىزدە التىن مەدال بارىن (ءزۇلفيا گابيدۋللينا) بىلەسىز. پارا پاۋەرليفتينگ ساڭلاقتارى دا مىقتى. ريودا وتكەن پاراليمپيادا ويىندارىندا وسى سپورت تۇرىنەن كۇمىس مەدالگە قول جەتكىزگەن بولاتىنبىز. جەڭىل اتلەتيكادان دا ءۇمىتىمىز زور. ەشقانداي سپورتشىلارىمىز السىزدىك تانىتپاسى انىق»، - دەيدى ول.
راۋان ءساتجانوۆ قازاقستاندا پارازيادا ويىندارىنىڭ باعدارلاماسىنا ەنبەي قالعان كوپتەگەن سپورت تۇرلەرى ورىستەپ كەلە جاتقانىن ايتادى. ماسەلەن، پاراليمپيادالىق ات سپورتىنىڭ دامۋى ەرەكشە.
زاڭ بويىنشا پاراازيادا ويىندارىندا توپ جارعان سپورتشىلارعا ازيادا ويىندارىندا جەڭىمپاز اتانعان سپورتشىلارمەن بىردەي سىياقى بەرىلۋى كەرەك. مۇنداي زاڭ ەلىمىزدە 2014-جىلى ەنگىزىلگەن. ەندەشە ىسكە ءسات! ەل نامىسىن نامىسىن قورعاۋعا كەتىپ بارا جاتقان سپورتشىلارىمىزعا مەدالدىڭ التىنىن تىلەيمىز!
