رەسەيدەگى «بەيبىت ميسسيا-2018» وقۋ- جاتتىعۋىنا قازاقستان اسكەريلەرى قاتىسۋدا

استانا. قازاقپارات -  رەسەيدىڭ چەليابى وبلىسىنداعى ورال تانكىلەر بىرلەستىگىنىڭ جاتتىعۋ الاڭىندا «بەيبىت ميسسيا-2018» وقۋ- جاتتىعۋ فازاسى باستالدى. شاراعا قازاقستانمەن بىرگە شاڭحاي ىنتىماقتاستىق ۇيىمىنا مۇشە 8 ەل جۇمىلدىرىلعان.

بۇل اسكەري جاتتىعۋ جىلىنا ەكى مارتە ۇيىمداستىرىلادى. قاتىسۋشى ەلدەردىڭ مۇددەسى ورتاق، ماقساتى ءبىر. ول -  تەرروريزمگە قارسى تۇرۋ. «بەيبىت ميسسيا-2018» جاتتىعۋى چەليابى وبلىسىنداعى چەباركۋل پاليگونىندا ءوتىپ جاتىر. شاراعا شاڭحاي ىنتىماقتاستىق ۇيىمى ەلدەرىنەن ءۇش مىڭداي اسكەري قىزمەتكەر جانە 500-گە جۋىق جەر جانە اۆياتسيالىق تەحنيكا تارتىلعان. قازاقستان قارۋلى كۇشتەرىنىڭ اتىنان س ۋ-30 س م ەكى جويعىشى، سۋ-25 ەكى شابۋىلداۋشى جانە س-295 تۋربينالى- ۆينتتى كولىك ۇشاقتارى ءوز قاۋقارىن پاش ەتەتىن بولادى.

سەگىز جىلدىق ەڭبەك ءوتىلى بار مايور ازات ابدۋلين اۋەدە 650 ساعات ۇشىپ ۇلگەرگەن. بۇگىن ول سۋ-25 جويعىشىن تىزگىندەيدى. وقۋ- جاتتىعۋ جۇمىستارى اياسىندا باسقا ەلدىڭ ۇشقىشتارىمەن بىرگە اۋەدە بارلاۋ جۇرگىزىپ، اسكەريلەردى قورعاپ، اۋە شابۋىلىن جاساۋدى جەتىك مەڭگەرەتىن بولادى.

 ازات ابدۋللين، س ۋ-25 ۇشقىشى:

 - بۇگىن بىزدە ەڭ ماڭىزدى وقۋ- جاتتىعۋ كۇنى. قاتىسىپ، قازاقستاننىڭ بەدەلىن جوعارى كوتەرەمىز. باسقا ەلدەردىڭ اسكەريلەرىمەن ءبىز ورىسشا نە اعىلشىنشا ارالاسامىز. اۋەدە باتىل قيمىلداۋ ءۇشىن الدىمەن تىڭعىلىقتى دايىندىقتان ءوتۋ كەرەك.

بۇل -  اسكەريلەردىڭ العاشقى ەرەجەسى. پوليگوندا ۇشار الدىنداعى بارلىق كەزەڭ ءجىتى پىسىقتالادى. مۇندا تەحنيكالىق توپقا باسىمدىق بەرىلەدى.

 باكتىبەك ساپارشايەۆ، س ۋ-25 اعا تەحنيگى:

 - ءبىزدىڭ باستى مىندەتىمىز -  قويىلعان تاپسىرمالاردى ۋاقىتىندا دايىنداپ، ۇشاقتى ۇشقىشتارعا دايىنداپ بەرۋ. ءبارىن تەكسەرۋىمىز كەرەك، كورۋىمىز كەرەك.

 «بەيبىت ميسسياعا» قازاقستان، رەسەي، قىتاي، ءۇندىستان، پاكىستان، قىرعىزستان جانە تاجىكستاننىڭ اسكەري باسقارما بولىمشەلەرى، قۇرلىق كۇشتەرى جانە اۆياتسيالارى جۇمىلدىرىلعان. وزبەكستان -  باقىلاۋشى ەل. جاتتىعۋدىڭ باستى ماقساتى -  لاڭكەستىككە قارسى وپەراتسيانى وتكىزۋ كەزىندە اسكەريلەردىڭ بارىنشا بىرلەسە ارەكەت ەتۋىنە قول جەتكىزۋ.

 ين تاي تۋن، ق ح ر ءا ءا ك توبى كومانديرىنىڭ ورىنباسارى:

 - «بەيبىت ميسسيا» -  مەملەكەتتەر اراسىنداعى اسكەري سەنىمدى نىعايتۋعا ارنالعان تاپتىرماس الاڭ. شاڭحاي ىنتىماقتاستىق ۇيىمى بەيبىت ءومىردى قامتاماسىز ەتۋ ءۇشىن قۇرىلعان. جانە تەرروريزمگە قارسى كۇرەس جولىندا بىرىگىپ ەڭبەك ەتۋگە، تاجىريبە الماسۋعا قاشان دا دايىنبىز.

شاڭحاي ىنتىماقتاستىق ۇيىمىنىڭ تەرروريزمگە قارسى وقۋ- جاتتىعۋىنا ءۇندىستان مەن پاكىستان العاش رەت قاتىسىپ وتىر. وسىلايشا «بەيبىت ميسسيا-2018» شاراسى اۋقىمدى الاڭعا اينالا ءتۇستى.

www.24.kz