ازيادا-2018: مەدال جاۋعان كۇن
ەسكە سالا كەتسەك، يندونەزيادا ءوتىپ جاتقان 2018-جىلعى ازيا ويىندارىنىڭ العاشقى كۇنى قازاقستاندىقتار التىن، كۇمىس جانە ەكى قولا مەدال جەڭىپ العان بولاتىن. «التىندى» سەمسەرلەسۋشى دميتري الەكسانين، «كۇمىستى» ەركىن كۇرەستەن دانيار قايسانوۆ، ءدال وسىنداي سپورت تۇرىنەن ساياتبەك وقاسوۆ مەن ادىلەت داۆلۋمبايەۆ قولا مەدالداردى يەلەنگەن ەدى.
ازيادا ويىندارىنىڭ ەكىنشى كۇنى ەل قورجىنىنا «كۇمىس» جۇلدە بۇيىردى. ونى وسىعان دەيىن حابارلاعانىمىزداي ەكىنشى ورىندى ايەلدەر كۇرەسىنەن جۇلدىز ەشىموۆا جەڭىپ الدى.
ءدال وسى كۇنى تاەكۆوندوشى فاريزا الدوڭعاروۆا ەل قورجىنىنا تاعى ءبىر قولا مەدالدى الىپ بەرگەن.
تارتىستى سايىستىڭ ءۇشىنشى كۇنى قازاقستان قورجىنىنا ءبىرشاما مەدال ءتۇستى. دەگەنمەن، مەدالداردىڭ ىشىندەگى «التىنى» ءالى دە بۇيىرماي تۇر. التىننان كەيىنگى كۇمىس جۇلدەنى كەشە ۇلتتىق قۇراماعا تاەكۆوندوشى جانسەل دەنيز، بالۋان المات كەبىسپايەۆ، سۋداعى پولودان قازاقستاننىڭ ايەلدەر قۇراماسى الىپ بەردى. ال قولا مەدال ماۋنتينبايكەر كيريلل كازانتسيەۆ، بالۋاندار ەلميرا سىزدىقوۆا مەن مەيرامبەك ايناعۇلوۆ، تاەكۆوندوشى رۋسلان جاپاروۆقا بۇيىردى.
ال بۇگىن قازاقستان قورجىنىنا قۇرلىقتاعى باسەكەنىڭ 8 مەدالى ءتۇستى. ناقتىراق ايتقاندا، اۋىر سالماقتاعى بالۋانىمىز نۇرماحان تىناليەۆ كۇمىس مەدال يەلەندى. ال قالعان 7 قولا مەدالدى جۇزۋدەن دميتري بالاندين، سەمسەرلەسۋدەن قازاقستاننىڭ ەرلەر مەن ايەلدەر قۇراماسى، تەكۆوندوشى نۇرلان مىرزابايەۆ، بالۋانداردان ەرۇلان ىسقاقوۆ پەن ازامات قىستاۋبايەۆ، ەسكەك ەسۋدەن الەكساندر كۋليكوۆ ەل قورجىنىنا سالدى.
مىنە، وسىلايشا ازيادانىڭ ءتورتىنشى كۇنىن قازاقستان جالپى رەيتينگتە 12-ورىنمەن اياقتادى.
