قازاقستان قۇراماسىنىڭ 2018-جىلعى ازيا ويىندارىنا ارنالعان كيىم ۇلگىسى تانىستىرىلدى
سپورتشىلاردىڭ جاڭا وبرازىن جاساۋدا كوشپەندىلەر تاقىرىبى باستى نازارعا الىندى.
كوللەكتسيانىڭ نەگىزگى نىسانى - تەحنو-ستيلدە ورىندالعان سۇڭقار قۇس. قازاقستان تاريحىندا جىرتقىش قۇستارمەن اڭ اۋلاۋ ۇلكەن ماڭىزعا يە ەكەنى بەلگىلى. اڭدى كوپ قاعاتىن قۇستار ەركىندىكتىڭ، بيىككە ۇمتىلۋدىڭ سيمۆولى بولىپ ەسەپتەلەدى. نەگىزگى دەتالداردىڭ ءبىرى رەتىندە بارلىق ونىمدەردەن كورىنەتىن «KZ» ارىپتەرىن ايتۋعا بولادى.
سپورتتىق ەكيپيروۆكا جاتتىعۋعا جانە شەرۋگە ارنالعان كوستيۋمدەردەن، پولو، شولاق شالبار، جەڭىل جەيدە جانە وزگە دە قاجەتتى ەلەمەنتتەردەن قۇرالعان. بارلىعى 16 باعىت بار. فورمانىڭ ديزاينى مەن دايىندالۋى قازاقستاندىق وندىرۋشىلەرگە تاپسىرىلدى. فورماداعى كيىمدەردىڭ بارلىعى ازيا ويىندارىن قابىلداۋشى مەملەكەت - يندونەزيانىڭ كليماتتىق ەرەكشەلىكتەرىن ەسەپكە الا وتىرىپ دايىندالدى.
